दीपिका पदुकोणचा ऐतिहासिक टप्पा; मेटा एआयला आवाज देणारी पहिली भारतीय सेलिब्रिटी
मुंबई, १६ ऑक्टोबर २०२५ – बॉलिवूड अभिनेत्री दीपिका पदुकोण हिनं एक ऐतिहासिक टप्पा गाठत मेटा एआयला आवाज देणारी पहिली भारतीय सेलिब्रिटी होण्याचा मान मिळवला आहे. मेटाच्या व्हर्च्युअल इकोसिस्टमचा भाग असलेल्या या एआय असिस्टंटमध्ये आता दीपिकाचा आवाज ऐकायला मिळणार आहे.
मेटा एआय ही मेटा कंपनीची विकसित केलेली आर्टिफिशियल इंटेलिजन्स प्रणाली असून, ती रे-बॅन मेटा स्मार्ट ग्लासेस आणि इतर उपकरणांमध्ये वापरली जाते. दीपिका आता या जागतिक पातळीवरच्या आवाज असलेल्या सेलिब्रिटींच्या यादीत सामील झाली आहे, ज्यामध्ये हॉलिवूड कलाकार ऑक्वाफिना आणि ज्युडी डेंच यांचाही समावेश आहे.
या यशामुळे दीपिका पदुकोणचे देश-विदेशातून भरपूर कौतुक होत आहे. भारतातील युजर्स आता दीपिकाच्या आवाजात मेटा एआयसोबत संवाद साधू शकणार आहेत. हा अनुभव सध्या भारत, अमेरिका, कॅनडा, युनायटेड किंग्डम, ऑस्ट्रेलिया आणि न्यूझीलंडमध्ये इंग्रजी भाषेत उपलब्ध असून, कंपनीने हिंदी भाषा आणि यूपीआय लाइट पेमेंट सुविधा देखील सुरु केली आहे, ज्यामुळे वापरकर्त्यांना अधिक वैविध्यपूर्ण आणि उपयुक्त अनुभव मिळणार आहे.
दीपिकाच्या या सहभागामुळे जागतिक तंत्रज्ञान क्षेत्रात भारताचं प्रतिनिधित्व अधिक ठळकपणे घडून आलं आहे. मेटाने भारताच्या सांस्कृतिक विविधतेला आणि भाषिक सामर्थ्याला दिलेला हा सन्मान असल्याचं मानलं जात आहे. अभिनय क्षेत्राच्या पलीकडे दीपिकाने आता डिजिटल आणि तंत्रज्ञान क्षेत्रातही पाऊल ठेवले असून, तिच्या कारकिर्दीतील हा एक महत्त्वपूर्ण टप्पा ठरतोय.
