१३ लाखांची सुपारी देऊन पतीच्या मैत्रिणीची हत्या! पत्नीच निघाली कटाची सूत्रधार?

GPS लोकेशनच्या आधारे बोंडराणी जंगलात गाठले; चाकूने वार करून वर्षा तुरकर यांची हत्या, पाच दिवसांत चार आरोपी जेरबंद
छत्तीसगडमधील व्यक्तीने पुरवली सुपारीची रक्कम; २५० ते ३०० सीसीटीव्ही फुटेज तपासून पोलिसांनी उलगडला हत्येचा कट, दोघे अद्याप फरार
गोंदिया : विवाहबाह्य संबंधांच्या संशयातून निर्माण झालेल्या वादाचा शेवट थेट हत्येच्या कटात झाल्याची धक्कादायक घटना गोंदिया जिल्ह्यातील तिरोडा तालुक्यात उघडकीस आली आहे. बोंडराणी जंगलातील शिवमंदिराजवळ झालेल्या वर्षा तुरकर हत्याकांडाचा पोलिसांनी अवघ्या पाच दिवसांत उलगडा केला आहे. पतीच्या मैत्रिणीची हत्या घडवून आणण्यासाठी पत्नीने कथितरीत्या तब्बल १३ लाख रुपयांची सुपारी दिल्याचे तपासात समोर आले आहे. विशेष म्हणजे, हत्येच्या दिवशी पीडित महिला कोणत्या ठिकाणी आहे, याची माहिती मिळवण्यासाठी आरोपींनी कारमधील GPS ट्रॅकिंग प्रणालीचा वापर केला. या प्रकरणात पोलिसांनी चार आरोपींना अटक केली असून अन्य दोघांचा शोध सुरू आहे.
जंगलातील शिवमंदिराजवळ केला चाकूने हल्ला
१४ नोव्हेंबर रोजी तिरोडा तालुक्यातील बोंडराणी जंगल परिसरातील शिवमंदिराजवळ वर्षा तुरकर यांची निर्घृण हत्या करण्यात आली होती. मूळच्या मध्य प्रदेशातील बालाघाट जिल्ह्यातील खेरलांजी येथील रहिवासी असलेल्या वर्षा सुट्टीसाठी माहेरी आल्या होत्या. त्या आपले मित्र नितेश अग्रवाल यांच्यासोबत कारने तिरोडा परिसरात फिरण्यासाठी गेल्या होत्या.
सायंकाळी परत येत असताना जंगलातील शिवमंदिराजवळ त्यांची कार थांबली. त्याचवेळी दुचाकीवरून आलेल्या तिघांनी वर्षा यांच्यावर चाकूने हल्ला केला. त्यांच्या पोटावर आणि पाठीवर वार करण्यात आले. या हल्ल्यात वर्षा यांचा मृत्यू झाला, तर नितेश अग्रवाल या हल्ल्यातून बचावले. या घटनेनंतर १५ नोव्हेंबर रोजी दवणीवाडा पोलिस ठाण्यात खुनाचा गुन्हा दाखल करण्यात आला.
पतीच्या मैत्रीमुळे पत्नी नाराज; रचला हत्येचा कट
पोलिस तपासात या हत्येमागील कथित कारण समोर आले आहे. नितेश अग्रवाल आणि वर्षा तुरकर यांच्यातील मैत्रीमुळे नितेश यांची पत्नी मोना अग्रवाल नाराज होती. वर्षा लवकरच गोंदियात राहण्यासाठी येणार असल्याची माहिती मिळाल्यानंतर पती-पत्नीमध्ये वाद वाढल्याचे तपासात निष्पन्न झाल्याची माहिती पोलिसांनी दिली.
याच नाराजीतून मोना अग्रवाल हिने शेजारी राहणाऱ्या कुणाल कुंभलकर याच्या मदतीने शाहरुख खान पठाण याच्याशी संपर्क साधल्याचा आरोप आहे. वर्षा यांची हत्या करण्यासाठी तब्बल १३ लाख रुपयांची सुपारी देण्यात आल्याचे तपासात पुढे आले आहे. शाहरुखने हे काम पूर्ण करण्यासाठी इमरान शेख, नलेन शेख आणि क्रिश राऊत यांची मदत घेतल्याचेही पोलिसांनी सांगितले.
GPS ट्रॅकिंगने शोधले वर्षा यांचे लोकेशन
या संपूर्ण हत्याकांडातील सर्वात धक्कादायक बाब म्हणजे आरोपींनी हत्येसाठी GPS ट्रॅकिंगचा वापर केल्याचा आरोप आहे. नितेश अग्रवाल वापरत असलेली कार मोना अग्रवाल यांच्या नावावर होती. मोनाने कारच्या GPS ॲपचा आयडी आणि पासवर्ड आरोपींना दिल्याची माहिती तपासात समोर आली आहे.
याच ॲपच्या माध्यमातून कारचे लोकेशन मिळवून आरोपींनी वर्षा आणि नितेश यांचा माग काढला. GPS लोकेशनच्या आधारे आरोपी बोंडराणी जंगलापर्यंत पोहोचले आणि संधी साधून वर्षा यांच्यावर प्राणघातक हल्ला केला. हल्लेखोरांनी वर्षा यांनाच लक्ष्य केले, तर नितेश अग्रवाल या हल्ल्यातून बचावले.
३०० सीसीटीव्ही फुटेज तपासून आरोपींचा माग काढला
हत्येचे गांभीर्य लक्षात घेऊन पोलिसांनी तपासाची चक्रे वेगाने फिरवली. पोलिस अधीक्षक गोरख भामरे आणि अपर पोलिस अधीक्षक अभय डोंगरे यांच्या मार्गदर्शनाखाली स्थानिक गुन्हे शाखेने तपासाची सूत्रे हाती घेतली.
बोंडराणी जंगलापासून तिरोडा, खेरलांजी, वाराशिवनी आणि बालाघाट या मार्गांवरील सुमारे २५० ते ३०० सीसीटीव्ही कॅमेऱ्यांचे फुटेज तपासण्यात आले. या फुटेजच्या आधारे नितेश यांच्या कारचा पाठलाग करणाऱ्या दुचाकीस्वारांचा माग काढण्यात पोलिसांना यश आले. त्यानंतर मुर्री येथून इमरान करीम शेख याला ताब्यात घेण्यात आले. चौकशीदरम्यान त्याने गुन्ह्याची कबुली दिल्याची माहिती पोलिसांनी दिली.
पाच दिवसांत चार आरोपी अटकेत; दोघांचा शोध सुरू
तपासादरम्यान मिळालेल्या पुराव्यांच्या आधारे १९ नोव्हेंबर रोजी पोलिसांनी चार आरोपींना अटक केली. त्यामध्ये मोना अग्रवाल, कुणाल कुंभलकर, शाहरुख खान पठाण आणि इमरान करीम शेख यांचा समावेश आहे. या प्रकरणातील नलेन शेख आणि क्रिश राऊत हे दोघे अद्याप फरार असून पोलिस त्यांचा शोध घेत आहेत.
१३ लाखांच्या सुपारीसाठी छत्तीसगडमधून आर्थिक मदत?
या हत्याकांडात आणखी एक महत्त्वाचा आर्थिक पैलू समोर आला आहे. मोना अग्रवाल हिच्याकडे १३ लाख रुपयांची सुपारी देण्यासाठी स्वतःची पुरेशी आर्थिक व्यवस्था नव्हती. त्यामुळे छत्तीसगडमधील एका व्यक्तीने ही रक्कम पुरवल्याची माहिती पोलिस तपासात पुढे आली आहे. संबंधित व्यक्ती कोण आहे, तिचा मोना अग्रवालशी काय संबंध आहे आणि हत्येच्या कटात तिचा थेट सहभाग होता का, याचा तपास पोलिसांकडून सुरू आहे.
विवाहबाह्य संबंधांच्या संशयातून सुरू झालेला वाद, १३ लाखांची कथित सुपारी, GPS ट्रॅकिंगचा वापर आणि जंगलात केलेली हत्या अशा अनेक धक्कादायक बाबींमुळे हे प्रकरण चर्चेत आले आहे. अवघ्या पाच दिवसांत चार आरोपींना अटक करण्यात पोलिसांना यश आले असले, तरी फरार आरोपींची अटक आणि सुपारीसाठी पैसे पुरवणाऱ्या व्यक्तीचा शोध लागल्यानंतरच या हत्याकांडातील संपूर्ण कट उघड होणार आहे.



