AmravatiAmravati Policscitynewslatestnewss breakingnews

अमरावती शहर गुन्हे शाखेची मोठी कामगिरी; सहा घरफोडीचे गुन्हे उघडकीस!

गाडगेनगर आणि नागपुरी गेट परिसरातील घरफोड्यांचा छडा; रोकड, मोबाईल, चांदीची नाणी, घड्याळ आणि दुचाकीसह २ लाख २० हजारांचा मुद्देमाल जप्त

अमरावती | प्रतिनिधी

अमरावती शहरात घरफोडीच्या वाढत्या घटनांना आळा घालण्यासाठी पोलीस आयुक्तांच्या निर्देशानुसार गुन्हे शाखेने प्रभावी कारवाई करत सहा घरफोडीचे गुन्हे उघडकीस आणले आहेत. गुप्त बातमीदारांकडून मिळालेली माहिती आणि रेकॉर्डवरील आरोपींच्या तपासाच्या आधारे पोलिसांनी गाडगेनगर आणि नागपुरी गेट पोलीस ठाण्याच्या हद्दीतील घरफोडीच्या प्रकरणांचा छडा लावला. या कारवाईत रोख रक्कम, मोबाईल, चांदीची नाणी, घड्याळ आणि दुचाकी असा एकूण २ लाख २० हजार रुपयांचा मुद्देमाल जप्त करण्यात आला आहे.

पोलीस आयुक्तालयाच्या हद्दीत घडणाऱ्या घरफोडीच्या घटनांना प्रतिबंध घालण्यासाठी पोलीस आयुक्तांनी गुन्हे शाखेला विशेष सूचना दिल्या होत्या. त्यानुसार गुन्हे शाखेचे अधिकारी व अंमलदार यांनी गुप्त बातमीदारांकडून माहिती संकलित केली. तसेच यापूर्वीच्या गुन्ह्यांमधील आरोपींची माहिती तपासून घरफोडीच्या घटनांचा माग काढण्यात आला. या तपासातून गाडगेनगर आणि नागपुरी गेट पोलीस ठाण्यात दाखल असलेले सहा गुन्हे उघडकीस आणण्यात पोलिसांना यश आले.

सहा गुन्ह्यांतील जप्त मुद्देमाल

या कारवाईत गाडगेनगर पोलीस ठाण्यातील तीन, तर नागपुरी गेट पोलीस ठाण्यातील तीन अशा एकूण सहा गुन्ह्यांचा समावेश आहे.

गाडगेनगर पोलीस ठाण्यातील गुन्हा क्रमांक १२०७/२०२६ मध्ये पाच चांदीची नाणी, एक टायटन कंपनीचे सोन्याच्या रंगाचे घड्याळ आणि दोन हजार रुपये रोख असा मुद्देमाल जप्त करण्यात आला. या मुद्देमालाची किंमत अनुक्रमे ६ हजार, २ हजार आणि २ हजार रुपये आहे.

नागपुरी गेट पोलीस ठाण्यातील गुन्हा क्रमांक २१२/२०२६ मध्ये आयफोन-१३ मोबाईल, ज्याची किंमत ३४ हजार रुपये, तसेच १३ हजार रुपये रोख जप्त करण्यात आले.

गाडगेनगर पोलीस ठाण्यातील गुन्हा क्रमांक ७००/२०२६ मध्ये २० हजार रुपये, तर गुन्हा क्रमांक ७१४/२०२६ मध्ये १५ हजार रुपये रोख जप्त करण्यात आले.

नागपुरी गेट पोलीस ठाण्यातील गुन्हा क्रमांक ११६२/२०२६ मध्ये ८ हजार रुपये रोख मिळाले. तसेच गुन्हा क्रमांक ५७४/२०२६ मध्ये २५ हजार रुपये रोख, मोबाईलचे बिल असलेला रेडमी कंपनीचा मोबाईल बॉक्स आणि एमएच ३१/डीटी ०१४२ क्रमांकाची दुचाकी, ज्याची किंमत ९५ हजार रुपये आहे, असा मुद्देमाल जप्त करण्यात आला.

अशा प्रकारे सहाही गुन्ह्यांमधून एकूण २ लाख २० हजार रुपयांचा मुद्देमाल पोलिसांनी हस्तगत केला आहे.

वरिष्ठ अधिकाऱ्यांच्या मार्गदर्शनाखाली कारवाई

ही कारवाई पोलीस आयुक्त रोखेश ओला, पोलीस उपायुक्त यशवंत सोळंके, पोलीस उपायुक्त श्याम घुगे यांच्यासह वरिष्ठ अधिकाऱ्यांच्या मार्गदर्शनाखाली करण्यात आली. गुन्हे शाखेचे अधिकारी व अंमलदार तसेच संबंधित पोलीस ठाण्यांच्या पथकांनी या तपासात सहभाग घेतला.

शहरातील घरफोडीच्या घटनांचा छडा लावून सहा गुन्हे उघडकीस आणल्याने गुन्हे शाखेच्या या कामगिरीचे पोलीस विभागात कौतुक होत आहे. शहरातील मालमत्तेविषयक गुन्ह्यांना आळा घालण्यासाठी पोलिसांकडून पुढील तपास आणि कारवाई सुरू आहे.

Show More

Related Articles

Leave a Reply

Your email address will not be published. Required fields are marked *

Back to top button