‘अच्छे दिन’ आणणाऱ्यांनी जनतेला चुना लावला; यशोमती ठाकूर यांचा भाजपवर जोरदार निशाणा

ऑक्टोबर महिन्यात २८ शेतकऱ्यांच्या आत्महत्या झाल्याचा दावा; भाजप नेत्यांच्या कुटुंबीयांवर टीका करत संस्कृतीच्या मुद्द्यावरूनही साधला निशाणा
अमरावती : काँग्रेसच्या ज्येष्ठ नेत्या तथा माजी मंत्री यशोमती ठाकूर यांनी भाजपवर जोरदार टीका करत राज्यातील सत्ताधाऱ्यांना लक्ष्य केले आहे. ‘अच्छे दिन’चे आश्वासन देणाऱ्यांनी जनतेला चुना लावला आहे, अशी घणाघाती टीका त्यांनी केली. राज्यातील शेतकरी आत्महत्यांच्या प्रश्नावरूनही त्यांनी सरकारला धारेवर धरले.
यशोमती ठाकूर यांनी केलेल्या दाव्यानुसार, ऑक्टोबर महिन्यात तब्बल २८ शेतकऱ्यांनी आत्महत्या केल्या आहेत. शेतकऱ्यांच्या आत्महत्यांचा गंभीर प्रश्न कायम असताना सरकारकडून शेतकऱ्यांना दिलासा मिळत नसल्याचा आरोप त्यांनी केला. शेतकऱ्यांच्या प्रश्नांवर सरकारने ठोस भूमिका घ्यावी, अशी मागणीही त्यांच्या टीकेतून पुढे आली.
यावेळी भाजप नेत्यांच्या कुटुंबीयांच्या राहणीमानावर आणि सार्वजनिक प्रतिमेवर भाष्य करत त्यांनी संस्कृतीच्या मुद्द्यावरूनही भाजपला लक्ष्य केले. भाजप नेत्यांच्या पत्नींच्या मॉडेलिंगचा उल्लेख करत, दुसरीकडे हेच लोक आम्हाला संस्कृती शिकवतात, अशी टीका ठाकूर यांनी केली.
त्यांच्या या वक्तव्यामुळे राज्यातील राजकीय वातावरणात नव्या वादाची शक्यता निर्माण झाली आहे. शेतकरी आत्महत्या, सत्ताधाऱ्यांची आश्वासने आणि संस्कृतीच्या मुद्द्यावरून यशोमती ठाकूर यांनी भाजपवर केलेल्या या टीकेला भाजपकडून काय प्रत्युत्तर मिळते, याकडे राजकीय वर्तुळाचे लक्ष लागले आहे.
बाईट : यशोमती ठाकूर, काँग्रेस नेत्या



