Buldhanacitynews

मेहकर न्यायालयीन कर्मचाऱ्यांचा बेमुदत संप; वेतनश्रेणीच्या मागणीसाठी ७० ते ८० कर्मचारी आंदोलनात!

उच्च न्यायालयातील कर्मचाऱ्यांप्रमाणे वेतनश्रेणी लागू करण्याची मागणी; संपाचा दुसरा दिवस, न्यायालयीन कामकाज ठप्प होण्याची शक्यता, वकील आणि पक्षकारही प्रभावित

सिटी न्यूज | गजानन राऊत, मेहकर (बुलढाणा)

बुलढाणा जिल्ह्यातील मेहकर येथील न्यायालयीन कर्मचाऱ्यांनी आपल्या विविध प्रलंबित मागण्यांसाठी आता बेमुदत संपाचे हत्यार उपसले आहे. उच्च न्यायालयातील कर्मचाऱ्यांप्रमाणे वेतनश्रेणी लागू करण्यात यावी, या प्रमुख मागणीसाठी कर्मचाऱ्यांनी कामबंद आंदोलन सुरू केले आहे. या संपाचा आज दुसरा दिवस असून, जवळपास ७० ते ८० न्यायालयीन कर्मचारी या आंदोलनात सहभागी झाले आहेत.

न्यायालयीन कर्मचाऱ्यांच्या म्हणण्यानुसार, उच्च न्यायालयातील कर्मचाऱ्यांना लागू असलेली वेतनश्रेणी आणि सेवा-सुविधा त्यांनाही मिळाव्यात. वेतनश्रेणीतील तफावत दूर करून समान कामासाठी समान वेतन आणि आवश्यक सेवा-सुविधा लागू कराव्यात, अशी त्यांची मागणी आहे. अनेक दिवसांपासून या मागण्यांचा पाठपुरावा करूनही अपेक्षित निर्णय होत नसल्याने अखेर कर्मचाऱ्यांनी बेमुदत संपाचा निर्णय घेतला आहे.

विशेष म्हणजे, जोपर्यंत मागण्या मान्य होत नाहीत, तोपर्यंत संप मागे घेणार नाही, अशी ठाम भूमिका आंदोलक कर्मचाऱ्यांनी घेतली आहे. त्यामुळे हा संप किती दिवस चालणार आणि शासनाकडून यावर काय तोडगा काढला जाणार, याकडे सर्वांचे लक्ष लागले आहे.

न्यायालयीन कामकाजावर परिणाम होण्याची शक्यता

न्यायालयीन कर्मचाऱ्यांच्या या संपामुळे मेहकर न्यायालयातील दैनंदिन कामकाजावर परिणाम होण्याची शक्यता निर्माण झाली आहे. विविध न्यायालयीन प्रक्रिया, प्रकरणांशी संबंधित प्रशासकीय कामे आणि पक्षकारांची कामे प्रभावित होण्याची भीती व्यक्त केली जात आहे. याचा थेट फटका न्यायालयात कामानिमित्त येणाऱ्या वकील आणि पक्षकारांना बसत आहे.

वकिलांकडूनही संप लवकर संपवण्याची मागणी

दरम्यान, या संपामुळे न्यायालयीन कामकाजात अडथळे निर्माण होत असल्याने मेहकर येथील वकिलांनीही यावर प्रतिक्रिया व्यक्त केली आहे. न्यायालयीन कर्मचाऱ्यांच्या मागण्या लवकरात लवकर मान्य करून हा संप संपवण्यात यावा, अशी अपेक्षा वकिलांनी व्यक्त केली. संपामुळे वकिलांच्या नियमित कामकाजावर तसेच पक्षकारांच्या न्यायालयीन प्रक्रियेवर परिणाम होत असल्याचे त्यांनी सांगितले.

एकीकडे न्यायालयीन कर्मचारी आपल्या वेतनश्रेणी आणि सेवा-सुविधांच्या मागण्यांसाठी आंदोलनावर ठाम आहेत, तर दुसरीकडे या संपामुळे न्यायालयीन कामकाज विस्कळीत होण्याची शक्यता आहे. त्यामुळे शासन आणि संबंधित न्यायप्रशासन या मागण्यांवर काय निर्णय घेते, तसेच हा बेमुदत संप कधी संपुष्टात येतो, हे पाहणे महत्त्वाचे ठरणार आहे.

मेहकर न्यायालयातून या संपाचा सविस्तर आढावा घेतला आहे आमचे प्रतिनिधी गजानन राऊत यांनी

Show More

Related Articles

Leave a Reply

Your email address will not be published. Required fields are marked *

Back to top button