समृद्धी महामार्गावर भीषण अपघात! भरधाव कंटेनरची १५ ते २० वाहनांना धडक; अनेक प्रवासी जखमी
नागपूरहून जालन्याकडे जाणाऱ्या मार्गावर अपघातांची मालिका; रस्त्यावर थांबलेल्या वाहनांना कंटेनरची जोरदार धडक, जखमींना रुग्णालयात हलविले
नागपूर : समृद्धी महामार्गावर भीषण अपघाताची घटना घडली असून, भरधाव कंटेनरने एकापाठोपाठ तब्बल १५ ते २० वाहनांना जोरदार धडक दिल्याची प्राथमिक माहिती समोर आली आहे. या विचित्र अपघातात अनेक प्रवासी जखमी झाले असून, महामार्गावर एकच खळबळ उडाली आहे.
मिळालेल्या प्राथमिक माहितीनुसार, नागपूरहून जालन्याच्या दिशेने जाणाऱ्या समृद्धी महामार्गावर यापूर्वी एक अपघात झाला होता. या अपघातामुळे महामार्गावरील काही वाहने रस्त्यावरच थांबली होती. दरम्यान, मागून भरधाव वेगाने आलेल्या कंटेनर चालकाचे वाहनावरील नियंत्रण सुटल्याने कंटेनरने समोर थांबलेल्या वाहनांना जोरदार धडक दिली. या धडकेत सुमारे १५ ते २० वाहनांचे नुकसान झाल्याचे सांगण्यात येत आहे.
धडक इतकी भीषण होती की, अनेक वाहनांचा चक्काचूर झाला असून काही प्रवासी वाहनांमध्ये अडकल्याची माहिती आहे. घटनेनंतर घटनास्थळी एकच गोंधळ उडाला. अपघातग्रस्त वाहनांमध्ये अडकलेल्या जखमींना बाहेर काढून तातडीने उपचारासाठी रुग्णालयात हलविण्यात आले.
या अपघातामुळे समृद्धी महामार्गावर काही काळ भीती आणि गोंधळाचे वातावरण निर्माण झाले. भरधाव वेगाने धावणारी अवजड वाहने आणि महामार्गावरील अपघातानंतरची सुरक्षा व्यवस्था याबाबत पुन्हा एकदा गंभीर प्रश्न उपस्थित झाले आहेत.
दरम्यान, जखमींची नेमकी संख्या, अपघाताचे अचूक ठिकाण आणि वाहनांच्या नुकसानीचा तपशील अद्याप अधिकृतरीत्या स्पष्ट झालेला नाही. संबंधित यंत्रणेकडून अधिकृत माहिती प्राप्त झाल्यानंतर पुढील तपशील समोर येणार आहे.
