तेलीपुरा इलेक्ट्रॉनिक मार्केटमध्ये पार्किंगवरून राडा; तरुणाने तलवार काढून दुकानदाराला दिली जीवे मारण्याची धमकी!
किरकोळ वादाचे हिंसक प्रकारात रूपांतर; घरातून तलवार आणून भररस्त्यात दहशत माजवण्याचा प्रयत्न, घटनेचा व्हिडिओ सोशल मीडियावर व्हायरल
नागपूर : शहरातील सीताबर्डी पोलीस ठाण्याच्या हद्दीतील तेलीपुरा इलेक्ट्रॉनिक मार्केट परिसरात वाहन पार्किंगच्या वादातून तणावपूर्ण घटना घडली. पार्किंगच्या किरकोळ कारणावरून एका दुकानदारासोबत झालेल्या वादाचे रूपांतर थेट तलवार दाखवण्यापर्यंत पोहोचले. एका स्थानिक तरुणाने घरातून तलवार आणून भररस्त्यात दहशत निर्माण करण्याचा प्रयत्न केल्याची माहिती समोर आली आहे. या घटनेमुळे परिसरात खळबळ उडाली आहे.
मिळालेल्या माहितीनुसार, तेलीपुरा इलेक्ट्रॉनिक मार्केट परिसरात वाहन पार्किंगच्या कारणावरून एका दुकानदाराचा स्थानिक तरुणासोबत वाद झाला. सुरुवातीला शाब्दिक बाचाबाची झाल्यानंतर वाद अधिक चिघळला. त्यानंतर संबंधित तरुणाने थेट घर गाठून तलवार आणली आणि पुन्हा घटनास्थळी येत तलवार दाखवून दुकानदाराला जीवे मारण्याची धमकी दिल्याचे सांगण्यात येत आहे.
भररस्त्यात तलवार दाखवण्याच्या या प्रकारामुळे परिसरातील नागरिक आणि व्यापाऱ्यांमध्ये भीतीचे वातावरण निर्माण झाले. घटनेचा संपूर्ण प्रकार मोबाईल कॅमेऱ्यात कैद झाला असून, या घटनेचा व्हिडिओ सध्या सोशल मीडियावर वेगाने व्हायरल होत आहे.
दरम्यान, वाहन पार्किंगसारख्या किरकोळ कारणावरून थेट शस्त्र बाहेर काढण्यापर्यंत वाद पोहोचल्याने शहरातील कायदा व सुव्यवस्थेचा प्रश्न पुन्हा ऐरणीवर आला आहे. सीताबर्डी पोलिसांनी या प्रकरणाची दखल घेत तपास सुरू केला असून, व्हायरल व्हिडिओच्या आधारे घटनेची सत्यता आणि संबंधित व्यक्तींची माहिती पडताळली जात आहे. या प्रकरणात पुढे काय कारवाई होते, याकडे परिसरातील नागरिकांचे लक्ष लागले आहे.
