पाच वर्षांत नेमका कोणता विकास केला? ग्रामस्थांचा सरपंचांना सवाल; सोलर टँक, नवीन बोअरवेल, नाल्यांची स्वच्छता आणि रस्त्यांच्या कामांची मागणी, अन्यथा तहसील कार्यालयासमोर आमरण उपोषणाचा इशारा
कारंजा लाड (वाशीम) : यंदा दुष्काळाचे सावट अधिक गडद होत असताना धनज बु. गावात ऐन नोव्हेंबर महिन्यातच तीव्र पाणीटंचाई निर्माण झाली आहे. गावातील नागरिकांना पिण्याच्या पाण्यासाठी मोठी वणवण करावी लागत असून, ग्रामपंचायतीकडून ठोस उपाययोजना होत नसल्याचा आरोप ग्रामस्थांनी केला आहे. पाणीटंचाईसह रखडलेली विकासकामे आणि मूलभूत सुविधांच्या अभावामुळे ग्रामस्थांमध्ये तीव्र नाराजी पसरली आहे.
धनज बु. गावात पाणीटंचाईची समस्या दरवर्षी उद्भवत असते. मात्र, यंदा दुष्काळाची तीव्रता लक्षात घेता प्रशासनाने आधीच नियोजन करून पाणीपुरवठ्याच्या पर्यायी व्यवस्था करणे अपेक्षित होते. असे असतानाही नोव्हेंबर महिन्यातच नागरिकांना पाण्यासाठी संघर्ष करावा लागत असल्याने ग्रामपंचायतीच्या कार्यपद्धतीवर प्रश्नचिन्ह उपस्थित केले जात आहे. गेल्या पाच वर्षांत सरपंचांनी गावाच्या विकासासाठी नेमके काय केले, असा संतप्त सवालही ग्रामस्थांकडून उपस्थित केला जात आहे.
केवळ पाणीटंचाईच नव्हे, तर गेल्या वर्षभरापासून रखडलेल्या मुख्य रस्त्यांच्या कामांमुळेही नागरिकांचे हाल होत आहेत. विशेषतः शाळकरी विद्यार्थ्यांना खराब रस्त्यांमुळे ये-जा करताना अडचणींचा सामना करावा लागत आहे. गावातील नाल्यांची साफसफाई आणि इतर मूलभूत सुविधांकडेही दुर्लक्ष होत असल्याचा आरोप ग्रामस्थांनी केला आहे. यासंदर्भात वारंवार अर्ज व निवेदने देऊनही प्रशासनाकडून अपेक्षित कार्यवाही होत नसल्याने नागरिकांचा संताप वाढत आहे.
या पार्श्वभूमीवर सामाजिक कार्यकर्ते विशाल तुळशीराम अहिरे यांच्यासह ग्रामस्थांनी प्रशासनाला लेखी निवेदन देत तातडीने उपाययोजना करण्याची मागणी केली आहे. गावात सोलर टँक उभारणे, नवीन बोअरवेल घेणे, नाल्यांची साफसफाई करणे तसेच रखडलेल्या मुख्य रस्त्यांचे काँक्रिटीकरण करणे, या प्रमुख मागण्या निवेदनातून करण्यात आल्या आहेत.
गावातील पाणीटंचाई आणि मूलभूत सुविधांचे प्रश्न तातडीने मार्गी न लावल्यास कारंजा लाड तहसील कार्यालयासमोर आमरण उपोषण सुरू करण्यात येईल, असा ठाम इशाराही विशाल अहिरे यांच्यासह ग्रामस्थांनी दिला आहे. त्यामुळे धनज बु. येथील पाणीटंचाईचा प्रश्न आता आंदोलनाच्या उंबरठ्यावर पोहोचला आहे. ग्रामस्थांच्या मागण्यांची प्रशासन कितपत दखल घेते आणि प्रत्यक्ष उपाययोजना कधी सुरू होतात, याकडे परिसरातील नागरिकांचे लक्ष लागले आहे.
प्रतिनिधी : सागर घोडे
