पॅथॉलॉजी लॅबमधून १० हजार ५०० रुपयांची चोरी; सराईत महिला पोलिसांच्या ताब्यात!
मोरभवन परिसरात पेट्रोलिंगदरम्यान सीताबर्डी पोलिसांची कारवाई; धंतोली, तहसील, बर्डी आणि अजनी पोलीस ठाण्यांतही गुन्हे दाखल
नागपूर : नागपूरच्या सीताबर्डी परिसरातील पॅथॉलॉजी लॅबमधून रोख १० हजार ५०० रुपये चोरी केल्याप्रकरणी पोलिसांनी एका महिलेला ताब्यात घेतले आहे. मोरभवन परिसरात पेट्रोलिंगदरम्यान संशयास्पदरीत्या आढळलेल्या या महिलेकडे चौकशी केली असता तिने पॅथॉलॉजी लॅबमधील चोरी केल्याची कबुली दिल्याची माहिती पोलिसांनी दिली आहे. अनिता नारायण चौधरी (वय ३९, रा. अजनी रेल्वे क्वार्टर) असे ताब्यात घेतलेल्या महिलेचे नाव आहे.
मिळालेल्या माहितीनुसार, सीताबर्डी अर्थात बर्डी पोलीस ठाण्याच्या हद्दीत पुष्पकुंज अपार्टमेंट आणि हॉटेल सेंटर पॉईंटच्या बाजूला असलेल्या एका पॅथॉलॉजी लॅबोरेटरीमधून १० हजार ५०० रुपयांची रोख रक्कम चोरीला गेली होती. या प्रकरणी सीताबर्डी पोलीस ठाण्यात अपराध क्रमांक ७८४/२६ अन्वये भारतीय न्याय संहितेच्या कलम ३०३(२) अंतर्गत गुन्हा दाखल करण्यात आला होता.
या चोरीच्या घटनेचा तपास सुरू असताना सीताबर्डी पोलिसांचे शोध पथक मोरभवन परिसरात पेट्रोलिंग करीत होते. यावेळी एक महिला संशयास्पदरीत्या वावरताना आढळून आली. पोलिसांनी महिला पोलीस अंमलदाराच्या मदतीने तिला ताब्यात घेऊन पोलीस ठाण्यात आणले. तेथे केलेल्या चौकशीत तिने पॅथॉलॉजी लॅबमधील चोरी केल्याची कबुली दिल्याचे पोलिसांकडून सांगण्यात आले.
चार पोलीस ठाण्यांत यापूर्वीही गुन्हे दाखल
ताब्यात घेतलेल्या अनिता नारायण चौधरी हिच्यावर यापूर्वी नागपूरमधील धंतोली, तहसील, सीताबर्डी आणि अजनी पोलीस ठाण्यांतही गुन्हे दाखल असल्याची माहिती समोर आली आहे. त्यामुळे या महिलेच्या पूर्वीच्या गुन्हेगारी पार्श्वभूमीचीही पोलिसांकडून पडताळणी केली जात आहे.
दरम्यान, पॅथॉलॉजी लॅबमधून चोरीला गेलेली १० हजार ५०० रुपयांची रक्कम हस्तगत करण्यासाठी पोलिसांकडून पुढील तपास सुरू आहे. या प्रकरणात महिलेच्या अन्य संभाव्य सहभागाचीही चौकशी केली जात आहे.
या घटनेचा पुढील तपास सीताबर्डी पोलीस करीत आहेत.
