बडनेऱ्यात निराधारांच्या चेहऱ्यावर फुलले आनंदाचे हास्य! आमदार प्रविण पोटे पाटील यांचा सेवाभावी उपक्रम
पोटे पाटील कुटुंबीयांनी निराधारांसोबत साजरी केली दिवाळी; नवीन कपडे, फराळ, मिष्टान्न आणि पुरणपोळीच्या स्नेहभोजनाची मेजवानी
बडनेरा, प्रतिनिधी : दिवाळी म्हणजे आनंद, उत्साह, प्रकाश आणि आपुलकीचा सण. मात्र समाजातील निराधार, वयोवृद्ध आणि दुर्लक्षित घटकांच्याही आयुष्यात आनंदाचे दिवे उजळावेत, या सामाजिक भावनेतून माजी राज्यमंत्री तथा आमदार प्रविण पोटे पाटील, श्रेयसदादा पोटे पाटील आणि श्रुतीताई पोटे पाटील यांनी यंदाही सामाजिक बांधिलकी जपत बडनेरा येथे निराधारांसोबत दिवाळी साजरी केली. या उपक्रमामुळे आधार केंद्रातील निराधार नागरिकांच्या चेहऱ्यावर आनंदाचे हास्य फुलले.
अमरावती महानगरपालिकेच्या आधार केंद्रात वास्तव्यास असलेल्या निराधार नागरिकांसाठी या विशेष दिवाळी कार्यक्रमाचे आयोजन करण्यात आले होते. सणासुदीच्या काळात प्रत्येक जण आपल्या कुटुंबीयांसोबत आनंद साजरा करत असतो. मात्र ज्यांना कुटुंबाचा आधार नाही, अशा नागरिकांनाही दिवाळीचा आनंद अनुभवता यावा, या उद्देशाने पोटे पाटील कुटुंबीयांनी पुढाकार घेतला. केवळ भेटवस्तूंचे वाटप न करता त्यांच्यासोबत वेळ घालवून आपुलकी आणि मायेचा आधार देण्याचा प्रयत्न यावेळी करण्यात आला.
अभ्यंगस्नानापासून पुरणपोळीच्या स्नेहभोजनापर्यंत खास आयोजन!
कार्यक्रमाची सुरुवात पारंपरिक अभ्यंगस्नानाने करण्यात आली. त्यानंतर आधार केंद्रातील सर्व नागरिकांना नवीन कपडे, दिवाळीचा फराळ, मिष्टान्न आणि विविध जीवनोपयोगी साहित्याचे वाटप करण्यात आले. दिवाळीचा आनंद द्विगुणित करण्यासाठी सर्वांसाठी खास पुरणपोळीच्या स्नेहभोजनाचे आयोजनही करण्यात आले होते.
नवीन कपडे, स्वादिष्ट फराळ आणि स्नेहभोजनामुळे आधार केंद्रातील नागरिकांच्या चेहऱ्यावर समाधान आणि आनंद दिसून येत होता. आपल्यासोबतही दिवाळी साजरी करणारे आपले माणसे आहेत, ही भावना या उपक्रमातून त्यांना अनुभवता आली.
सेवाभावातून माणुसकीचा दिवा प्रज्वलित!
यावेळी आमदार प्रविण पोटे पाटील यांनी आपल्या भावना व्यक्त करताना सांगितले की, निराधार आणि वयोवृद्ध नागरिकांना आधार देणे ही समाजातील प्रत्येकाची जबाबदारी आहे. दिवाळीच्या एका पणतीच्या प्रकाशाप्रमाणे आपणही त्यांच्या आयुष्यात आनंदाचा प्रकाश निर्माण करू शकतो. अनेक वर्षांपासून अशा पद्धतीने दिवाळी साजरी करताना मिळणारे आत्मिक समाधान शब्दांत व्यक्त करणे कठीण असल्याचे त्यांनी सांगितले.
श्रेयसदादा पोटे पाटील यांनीही आधार केंद्रातील नागरिकांशी संवाद साधत सामाजिक बांधिलकीचे महत्त्व अधोरेखित केले. समाजातील गरजू आणि वंचित घटकांना मदतीचा हात देणे ही प्रत्येक नागरिकाची जबाबदारी आहे. युवा पिढीनेही अशा सामाजिक उपक्रमांमध्ये सक्रिय सहभाग घ्यावा, असे आवाहन त्यांनी केले. समाजाप्रती संवेदनशीलता आणि सेवाभाव जपल्यास खऱ्या अर्थाने सामाजिक परिवर्तन घडू शकते, अशी भावना त्यांनी व्यक्त केली.
दिवाळीच्या रोषणाईपेक्षा माणुसकीचा प्रकाश ठरला महत्त्वाचा!
आजच्या धावपळीच्या जीवनात अनेकदा स्वतःपुरताच विचार केला जातो. अशा परिस्थितीत निराधार नागरिकांसोबत दिवाळी साजरी करण्याचा पोटे पाटील कुटुंबीयांचा उपक्रम सामाजिक बांधिलकीचा संदेश देणारा ठरला. दिवाळी केवळ दिव्यांची आणि रोषणाईची नसून माणुसकी, आपुलकी आणि प्रेमाचीही आहे, याची जाणीव या उपक्रमातून करून देण्यात आली.
या कार्यक्रमामुळे आधार केंद्रातील नागरिकांच्या दिवाळीत आनंदाचे रंग भरले गेले. त्यांच्या चेहऱ्यावरील हास्य आणि समाधान हेच या उपक्रमाचे खरे यश ठरले.
मान्यवरांची उपस्थिती
या कार्यक्रमाला शिवराय कुळकर्णी, जयंत डेहनकर, तुषार भारतीय, चेतन पवार, अॅड. चेतन गावंडे, सुरेखाताई लुंगारे, लताताई देशमुख, भारती गुहे, प्रकाश पुंड, डॉ. बबन लायदे, डॉ. वीरेंद्र ढोबळे, मनीष चौबे, अभिजित वानखडे, रोहित देशमुख, अक्षय पोटे, विनोद तन्वैस, संजय कटारिया, नरेश दमाई, रोशनी वाकोडे, योगेश निमकर, गंगा अंभोरे आदी मान्यवर उपस्थित होते.
निराधारांच्या आयुष्यात आनंदाचा प्रकाश पसरवणारा आणि माणुसकीचे नाते जपणारा पोटे पाटील कुटुंबीयांचा हा दिवाळी उपक्रम बडनेऱ्यात विशेष चर्चेचा विषय ठरला.
