बडनेऱ्यात वीजतारा आणि डिश केबलचे धोकादायक जाळे; नागरिकांच्या सुरक्षेचा प्रश्न ऐरणीवर
लोंबकळणाऱ्या वीजवाहिन्यांमुळे धोका; दुर्घटना घडल्यानंतरच प्रशासन जागे होणार का?
बडनेरा : बडनेरा शहरात महावितरणच्या वीजवाहिन्यांचा धोकादायक प्रकार समोर आला आहे. अनेक ठिकाणी वीजतारा जमिनीच्या दिशेने लोंबकळत असून, त्याच परिसरात वीजतारांसोबत डिश केबलचे मोठे जाळे पसरलेले दिसून येत आहे. या परिस्थितीमुळे नागरिकांच्या सुरक्षेचा प्रश्न निर्माण झाला आहे.
बडनेरा शहर तसेच परिसरातील काही भागांमध्ये वीजतारा घरांच्या, इमारतींच्या आणि रस्त्यांवरील वाहनांच्या अगदी जवळून जात असल्याचे दिसून येत आहे. काही ठिकाणी या तारा धोकादायक पद्धतीने खाली लोंबकळत असल्याने नागरिकांमध्ये भीतीचे वातावरण आहे.
यासोबतच शहरातील विविध भागांमध्ये वीजतारांबरोबर डिश केबलचेही अनियंत्रित जाळे पसरलेले आहे. अनेक ठिकाणी केबल खाली लोंबकळत असल्याने पादचारी आणि वाहनचालकांना अडथळा तसेच संभाव्य धोका निर्माण झाला आहे. वीजतारा आणि केबलचे हे अनियंत्रित जाळे भविष्यात दुर्घटनेचे कारण ठरू शकते, अशी भीती व्यक्त केली जात आहे.
नागरिकांच्या म्हणण्यानुसार, धोकादायक वीजवाहिन्या आणि लोंबकळणाऱ्या तारांबाबत संबंधित यंत्रणेकडे यापूर्वी अनेकदा तक्रारी करण्यात आल्या आहेत. मात्र, अद्याप परिस्थितीत अपेक्षित सुधारणा झालेली नसल्याचा आरोप नागरिकांकडून करण्यात येत आहे.
दुर्घटना घडल्यानंतरच प्रशासन जागे होणार का, असा संतप्त सवाल नागरिकांकडून उपस्थित केला जात आहे.
बडनेरा शहरातील धोकादायक विद्युत खांब, वीजतारा आणि डिश केबलच्या जाळ्याची संबंधित यंत्रणांनी तातडीने पाहणी करावी, अशी मागणी नागरिकांनी केली आहे. लोंबकळणाऱ्या वीजतारा आणि केबल योग्य उंचीवर व्यवस्थित बांधण्यात याव्यात, धोकादायक विद्युत खांबांची तपासणी करून आवश्यकतेनुसार त्यांची दुरुस्ती किंवा बदली करण्यात यावी, तसेच संभाव्य दुर्घटना टाळण्यासाठी तातडीने उपाययोजना कराव्यात, अशी मागणी होत आहे.
नागरिकांच्या सुरक्षेचा प्रश्न लक्षात घेता कोणतीही दुर्घटना घडण्याची वाट न पाहता महावितरण आणि संबंधित यंत्रणांनी तातडीने कारवाई करणे गरजेचे असल्याचे नागरिकांचे म्हणणे आहे.
