लग्नाला अवघे चार महिने… नवविवाहितेचा मृत्यू; हुंड्यासाठी छळाचा आरोप
आईला शेवटचा फोन करत म्हणाली, मला माणसं चांगली भेटली नाहीत; सासरच्यांविरोधात गुन्हा दाखल
पुणे : रात्रीचे साडेनऊ वाजले होते… २३ वर्षीय वैष्णवीचा आईला फोन आला. आवाज शांत होता, मात्र तिच्या शब्दांनी आईच्या काळजाचा ठोका चुकला. आई, मला माणसं चांगली भेटली नाहीत, असं वैष्णवीने आईला सांगितल्याची माहिती कुटुंबीयांनी दिली आहे.
आईने काळजीने विचारणा केली असता, उद्या सकाळी सविस्तर बोलूया, असं सांगून वैष्णवीने फोन ठेवला. मात्र, कुटुंबीयांच्या म्हणण्यानुसार, अवघ्या दोन तासांनंतर तिच्या आत्महत्येची बातमी समोर आली.
पुण्याच्या पुरंदर तालुक्यातील कोडीत खुर्द येथील वैष्णवीला तिच्या कुटुंबीयांनी उच्च शिक्षण दिलं होतं. तिने आयटी इंजिनिअरिंगची पदवी घेतली होती आणि पुण्यातील एका कंपनीत नोकरीही सुरू केली होती.
याचदरम्यान तिची ओळख ओंकार गिसरे याच्याशी झाली. दोघांमध्ये प्रेमसंबंध निर्माण झाले आणि त्यांनी विवाह करण्याचा निर्णय घेतला. सुरुवातीला कुटुंबीयांचा विरोध होता. मात्र मुलीच्या इच्छेखातर अखेर कुटुंबीयांनी लग्नाला संमती दिली.
सुमारे चार महिन्यांपूर्वी दोघांचा विवाह झाला. लग्नानंतर वैष्णवी उरुळी कांचनजवळील वडाची वाडी परिसरातील वृंदावन सोसायटीमध्ये पती आणि सासू-सासऱ्यांसोबत राहत होती.
मात्र, काही काळानंतर माहेरून चारचाकी वाहन घेण्यासाठी पाच लाख रुपये आणावेत, अशी मागणी करण्यात आल्याचा गंभीर आरोप वैष्णवीच्या कुटुंबीयांनी केला आहे. या मागणीवरून तिचा मानसिक छळ केला जात असल्याचाही आरोप करण्यात आला आहे.
घटनेच्या रात्री वैष्णवीने आईला फोन केला आणि आपल्याला चांगली माणसं भेटली नसल्याचं सांगितल्याचा दावा कुटुंबीयांनी केला आहे. त्यानंतर सकाळी बोलण्याचं आश्वासन देऊन तिने फोन ठेवला.
मात्र काही वेळातच तिच्या मृत्यूची बातमी कुटुंबीयांना मिळाली. वैष्णवीच्या पतीने किंवा सासरच्या व्यक्तींनी थेट माहिती न देता एका नातेवाईकाने फोन करून घटना सांगितल्याचा दावा तिच्या वडिलांनी केला आहे.
घटनेची माहिती मिळताच कुटुंबीयांनी घटनास्थळी धाव घेतली. मुलीचा मृतदेह पाहिल्यानंतर तिच्या वडिलांनी सासरच्या मंडळींवर पाच लाख रुपयांच्या मागणीसाठी छळ केल्याचा आरोप केला आणि काळेपडळ पोलीस ठाण्यात तक्रार दाखल केली.
या तक्रारीच्या आधारे पोलिसांनी हुंड्यासाठी छळ आणि आत्महत्येस प्रवृत्त केल्याच्या आरोपांनुसार गुन्हा दाखल केला असून, या प्रकरणाचा तपास सुरू आहे.
दरम्यान, वैष्णवीच्या कुटुंबीयांनी संबंधितांवर कठोर कारवाई करण्याची मागणी केली आहे.
मात्र, कुटुंबीयांनी केलेले आरोप हे तपासाचा विषय असून, त्यांची सत्यता अद्याप सिद्ध झालेली नाही. वैष्णवीच्या मृत्यूमागची नेमकी परिस्थिती काय होती, हुंड्याची मागणी करण्यात आली होती का, मानसिक छळ झाला होता का आणि या मृत्यूला कोण जबाबदार आहे, याचा उलगडा पोलिसांच्या तपासातून होणार आहे.
चार महिन्यांपूर्वीच झालेल्या विवाहानंतर एका तरुण विवाहितेचा मृत्यू झाल्याने हुंडा आणि कौटुंबिक छळाचा गंभीर प्रश्न पुन्हा ऐरणीवर आला आहे. आता या प्रकरणातील सत्य तपासातून समोर येण्याची प्रतीक्षा आहे.
