गुरुकुंज मोझरीत दुष्काळी GR ची होळी! वाळलेल्या सोयाबीनसह शेतकऱ्यांचा संताप; हेक्टरी १ लाख मदतीची मागणी
शासनाच्या दुष्काळी मदत निर्णयाचा शेतकऱ्यांकडून अनोख्या पद्धतीने निषेध; केवळ सवलती नव्हे तर थेट आर्थिक मदत देण्याची मागणी
अमरावती | गुरुकुंज मोझरी
नमस्कार! सिटी न्यूजमध्ये आपलं स्वागत.
अमरावती जिल्ह्यातील गुरुकुंज मोझरी येथे राज्य सरकारच्या दुष्काळी मदतीच्या शासन निर्णयाविरोधात शेतकऱ्यांचा संताप पाहायला मिळाला. बस स्थानकासमोर संतप्त शेतकऱ्यांनी वाळलेल्या सोयाबीनसह शासन निर्णयाची होळी करत सरकारच्या दुष्काळी मदतीचा निषेध केला.
यावेळी आंदोलक शेतकऱ्यांनी सरसकट सर्व पीक उत्पादक शेतकऱ्यांना हेक्टरी एक लाख रुपयांची मदत देण्याची मागणी केली.
गुरुकुंज मोझरी येथे दुष्काळी मदतीच्या शासन निर्णयाविरोधात शेतकरी आक्रमक झाल्याचे पाहायला मिळाले. हातात वाळलेले सोयाबीन घेत शेतकऱ्यांनी शासन निर्णयाची होळी केली आणि सरकारच्या धोरणाविरोधात घोषणाबाजी केली.
आंदोलकांच्या म्हणण्यानुसार, दुष्काळी परिस्थितीमुळे खरीप पिकांचे मोठ्या प्रमाणात नुकसान झाले आहे. अशा परिस्थितीत केवळ सवलती जाहीर करून शेतकऱ्यांच्या अडचणी दूर होणार नाहीत, असा आक्षेप त्यांनी नोंदवला.
सरसकट सर्व पीक उत्पादक शेतकऱ्यांना हेक्टरी एक लाख रुपये थेट मदत द्यावी, अशी प्रमुख मागणी यावेळी करण्यात आली. दुष्काळी मदतीच्या निर्णयात प्रत्यक्ष नुकसान झालेल्या शेतकऱ्यांना पुरेसा आर्थिक दिलासा मिळत नसल्याचा दावा आंदोलकांनी केला.
यावेळी सामाजिक कार्यकर्ते प्रशांत कांबळे आणि शेतकरी संदीप हगवणे यांनी आपली भूमिका मांडली. दुष्काळी सवलतींचा शासन निर्णय म्हणजे मेलेल्या शेतकऱ्याला व्हेंटिलेशन लावण्याचा प्रकार असल्याचा आरोपही आंदोलकांकडून करण्यात आला.
दरम्यान, शेतकरीविरोधी धोरणांचा निषेध करत आंदोलकांनी सरकारविरोधात जोरदार घोषणाबाजी केली. वाळलेले सोयाबीन हातात घेऊन शासन निर्णयाची होळी करण्यात आल्याने या आंदोलनाची परिसरात चर्चा झाली.
राज्य सरकारने दुष्काळग्रस्त भागांसाठी कर्जवसुलीला स्थगिती, कर्ज पुनर्गठन, महसुली सवलती, वीजसंबंधी सवलती आणि इतर उपाययोजना जाहीर केल्या आहेत. मात्र, या उपाययोजनांपेक्षा थेट आर्थिक मदत आवश्यक असल्याची भूमिका शेतकरी आणि काही राजकीय नेत्यांकडून मांडली जात आहे.
आता गुरुकुंज मोझरीतील शेतकऱ्यांनी केलेल्या हेक्टरी एक लाख रुपयांच्या मदतीच्या मागणीवर शासन काय निर्णय घेते, याकडे शेतकरी वर्गाचे लक्ष लागले आहे.
कॅमेरामनसह सिटी न्यूज.
