गणेशोत्सवाच्या पार्श्वभूमीवर अमरावतीत पोलिसांचा रूट मार्च

फ्रेझरपुरा पोलिसांचा कडक बंदोबस्त; 89 पोलीस अधिकारी आणि अंमलदारांचा सहभाग, संवेदनशील गणेश मंडळांची पाहणी

अमरावती : आगामी गणेशोत्सवाच्या पार्श्वभूमीवर अमरावती शहर पोलिसांनी कायदा आणि सुव्यवस्था अबाधित ठेवण्यासाठी सुरक्षेची तयारी सुरू केली आहे. फ्रेझरपुरा पोलीस ठाण्याच्या हद्दीत तब्बल 89 पोलीस अधिकारी आणि अंमलदारांचा सहभाग असलेला भव्य रूट मार्च काढण्यात आला. संवेदनशील गणेश मंडळे आणि परिसरांची प्रत्यक्ष पाहणी करत पोलिसांनी सुरक्षेच्या उपाययोजनांचा आढावा घेतला.

9 सप्टेंबर रोजी सायंकाळी 5 वाजता तक्षशिला कॉलेज येथून या रूट मार्चला सुरुवात झाली. त्यानंतर जुने पोलीस स्टेशन, भगतसिंग चौक, लायब्ररी चौक, शिव एकता चौक, सरदार चौक, कुंभारवाडा मार्गे पोलिसांचा ताफा यशोदा नगर चौकात पोहोचला. सायंकाळी 6 वाजून 45 मिनिटांपर्यंत हा रूट मार्च सुरू होता.

या संपूर्ण मार्गावर अनेक संवेदनशील गणेश मंडळे आणि संवेदनशील परिसर येत असल्याने पोलिसांनी प्रत्येक भागाची प्रत्यक्ष पाहणी केली. गणेशोत्सवाच्या काळात गर्दीचे नियोजन, सुरक्षेची व्यवस्था आणि कायदा-सुव्यवस्था याबाबत आवश्यक उपाययोजनांचा आढावा घेण्यात आला.

या रूट मार्चमध्ये एकूण 89 पोलीस अधिकारी आणि अंमलदार सहभागी झाले होते. यामध्ये 1 एसीपी, 2 पोलीस निरीक्षक, 5 पोलीस उपनिरीक्षक, 30 पोलीस ठाणे अंमलदार, 16 आरसीपी जवान, 6 डीबी पथकातील कर्मचारी आणि 29 सैनिक यांचा समावेश होता.

गणेशोत्सव हा मोठ्या उत्साहात साजरा केला जात असताना शहरातील संवेदनशील भागांमध्ये कोणताही अनुचित प्रकार घडू नये, यासाठी पोलिसांकडून विशेष दक्षता घेतली जात आहे. रूट मार्चच्या माध्यमातून संवेदनशील भागांमध्ये पोलिसांची उपस्थिती दाखवण्यासोबतच नागरिकांमध्ये सुरक्षिततेची भावना निर्माण करण्याचा प्रयत्न करण्यात आला.

गणेशोत्सवाच्या काळात गणेश मंडळांमध्ये मोठ्या प्रमाणात भाविकांची गर्दी होत असते. त्यामुळे पोलिसांकडून संवेदनशील ठिकाणांवर विशेष लक्ष ठेवण्यात येणार असून, कायदा आणि सुव्यवस्था बिघडविण्याचा प्रयत्न करणाऱ्यांवर कडक कारवाई करण्याचा इशारा देण्यात आला आहे.

दरम्यान, नागरिकांनी गणेशोत्सव शांतता, सलोखा, बंधुभाव आणि सामाजिक सौहार्दाच्या वातावरणात साजरा करावा, असे आवाहन फ्रेझरपुरा पोलिसांकडून करण्यात आले आहे. सोशल मीडियावर किंवा इतर माध्यमातून पसरणाऱ्या अफवा आणि संशयास्पद माहितीवर विश्वास ठेवू नये. कोणतीही अनुचित घटना किंवा संशयास्पद हालचाल आढळल्यास तात्काळ पोलिसांना माहिती द्यावी, असेही पोलिसांनी स्पष्ट केले आहे.

गणेशोत्सवाच्या पार्श्वभूमीवर फ्रेझरपुरा पोलिसांचा हा रूट मार्च म्हणजे संवेदनशील भागांमध्ये कडक पोलिस बंदोबस्त आणि सुरक्षेची तयारी याचे स्पष्ट संकेत आहेत. आगामी उत्सव शांततेत पार पडण्यासाठी पोलीस प्रशासन सज्ज झाले असून, नागरिकांनीही पोलिसांना सहकार्य करून सामाजिक सलोखा कायम ठेवावा, असे आवाहन करण्यात आले आहे.