ईदच्या तयारीतून वाद पेटला; फुटबॉल खेळण्यावरून दोन कुटुंबांत हाणामारी
लायटिंग लावण्यावरून सुरू झालेला वाद विकोपाला; वीट आणि लाकडी दांड्याने मारहाणीचा आरोप, तिघांविरोधात गुन्हा
नागपूर : ईदच्या सणाच्या तयारीसाठी घरासमोर लायटिंग लावण्याचे काम सुरू असताना लहान मुले घरासमोर फुटबॉल खेळत असल्याच्या कारणावरून दोन कुटुंबांमध्ये वाद झाला. या किरकोळ वादाचे रूपांतर पुढे हाणामारीत झाले. या प्रकरणी पोलिसांनी तिघांविरोधात गुन्हा दाखल केला असून, पुढील कायदेशीर कारवाई सुरू आहे.
मिळालेल्या माहितीनुसार, ईदच्या सणाच्या पार्श्वभूमीवर फिर्यादी फिरोज पीर खान हे आपल्या घराजवळ लायटिंग लावण्यात व्यस्त होते. याचवेळी त्यांच्या घरासमोर काही लहान मुले फुटबॉल खेळत होती. फुटबॉल खेळण्यावरून फिरोज पीर खान आणि अहमद रजा यांच्यात वाद झाला.
पोलिसांच्या माहितीनुसार, हा वाद वाढत जाऊन अहमद रजा, गुलाम मोईनुद्दीन आणि सबीना बेगम यांनी फिर्यादी, त्यांच्या बहिणी तसेच कुटुंबातील इतर सदस्यांना शिवीगाळ आणि धक्काबुक्की केली. त्यानंतर वीट आणि लाकडी दांड्याने मारहाण केल्याचा आरोप करण्यात आला आहे.
या घटनेत काही जण जखमी झाले असून, त्यांच्यावर शासकीय रुग्णालयात उपचार करण्यात आले. घटनेनंतर पोलिसांनी प्रकरणाची नोंद घेत तिघांविरोधात गुन्हा दाखल केला आहे.
पोलिसांच्या माहितीनुसार, आरोपींविरोधात सदोष मनुष्यवधाच्या प्रयत्नाच्या कलमांतर्गत गुन्हा दाखल करण्यात आला असून, प्रकरणाचा पुढील तपास सुरू आहे.
ईदच्या सणाच्या तयारीदरम्यान फुटबॉल खेळण्याच्या किरकोळ कारणातून सुरू झालेला वाद थेट हाणामारीपर्यंत पोहोचल्याने परिसरात काही काळ तणावाचे वातावरण निर्माण झाले. नागरिकांनी किरकोळ वादाचे रूपांतर हिंसक संघर्षात होऊ नये, यासाठी संयम राखण्याचे आवाहन करण्यात येत आहे.
