भवानीनगर घरफोडी प्रकरणाची उकल; दोन आरोपी अटकेत, मुख्य आरोपी फरार
पारडी पोलिसांची कारवाई; ₹1.13 लाखांच्या चोरीप्रकरणी ₹13,400 चा मुद्देमाल जप्त
नागपूर | प्रतिनिधी
नागपूर शहरातील पारडी पोलीस ठाण्याच्या हद्दीतील भवानीनगर येथे झालेल्या घरफोडी प्रकरणाचा पोलिसांनी यशस्वी छडा लावत दोन आरोपींना अटक केली आहे. सुमारे १ लाख १३ हजार रुपयांच्या चोरीप्रकरणी पोलिसांनी १३ हजार ४०० रुपयांचा मुद्देमाल जप्त केला असून, या गुन्ह्यातील मुख्य आरोपी अद्याप फरार आहे. त्याचा शोध सुरू असल्याची माहिती पोलिसांनी दिली आहे.
पोलिसांनी दिलेल्या माहितीनुसार, २५ जुलै रोजी भवानीनगर परिसरात ही घरफोडीची घटना घडली. फिर्यादी संजय शेंडे यांनी घराला कुलूप लावून बाहेर गेल्यानंतर चोरट्यांनी संधी साधून घरात प्रवेश केला आणि सुमारे १ लाख १३ हजार रुपयांचा मुद्देमाल चोरी करून पसार झाले.
घटनेनंतर पारडी पोलीस ठाण्याच्या डीबी पथकाने सीसीटीव्ही फुटेजची तपासणी तसेच गुप्त बातमीदारांच्या मदतीने तपास सुरू केला. तपासादरम्यान नरेश रोशन उईके (वय १८ वर्षे) आणि राम हेमराज समकोसरे या दोघांना अटक करण्यात आली. दोघेही भांडेवाडी परिसरातील रहिवासी असून, त्यांच्या ताब्यातून १३ हजार ४०० रुपयांचा चोरीचा मुद्देमाल जप्त करण्यात आला आहे.
या गुन्ह्यातील मुख्य आरोपी इरफान शमशाद अन्सारी (वय २२ वर्षे), रा. अंब्या नगर, भांडेवाडी हा अद्याप फरार असून त्याचा शोध सुरू आहे. पोलिसांच्या माहितीनुसार, इरफान हा सराईत घरफोड्या असून त्याच्याविरुद्ध नागपूर शहरात घरफोडीचे अनेक गुन्हे नोंद आहेत.
तपासात आरोपींची कार्यपद्धतीही समोर आली आहे. कुलूपबंद आणि निर्जन घरे हेरून त्यांची रेकी करणे आणि संधी मिळताच घरफोडी करणे, अशी त्यांची पद्धत असल्याचे पोलिसांनी सांगितले.
या प्रकरणाचा पुढील तपास सुरू असून उर्वरित चोरीचा मुद्देमाल जप्त करण्यासाठी आणि फरार मुख्य आरोपीला अटक करण्यासाठी पोलिसांचे प्रयत्न सुरू आहेत. दरम्यान, नागरिकांनी घर बंद ठेवताना आवश्यक सुरक्षा उपाययोजना कराव्यात आणि संशयास्पद हालचाली दिसल्यास तातडीने पोलिसांना माहिती द्यावी, असे आवाहनही पोलिसांनी केले आहे.
