यवतमाळमध्ये मठाच्या दानपेटीवर चोरट्यांचा डल्ला; सीसीटीव्हीत कैद झालेली चोरी
झटाळा–तरोडा फाटा येथील श्री संत शहापुरी महाराज मठातील घटना; पारवा पोलिसांकडून आरोपीचा शोध सुरू
यवतमाळ | प्रतिनिधी
यवतमाळ जिल्ह्यातील झटाळा–तरोडा फाटा परिसरातील श्री संत शहापुरी महाराज मठात अज्ञात चोरट्यांनी दानपेटी फोडून त्यातील रोख रक्कम लंपास केल्याची धक्कादायक घटना उघडकीस आली आहे. विशेष म्हणजे, चोरीचा संपूर्ण प्रकार मठातील सीसीटीव्ही कॅमेऱ्यात कैद झाला असून या घटनेमुळे भाविकांमध्ये संतापाचे वातावरण निर्माण झाले आहे.
मिळालेल्या माहितीनुसार, सकाळी मठ उघडल्यानंतर दानपेटी फोडलेली असल्याचे निदर्शनास आले. त्यानंतर दानपेटीतील रोख रक्कम चोरीला गेल्याचे स्पष्ट होताच मठ प्रशासनाने तातडीने पारवा पोलिसांना माहिती दिली.
माहिती मिळताच पारवा पोलिसांनी घटनास्थळी धाव घेत पंचनामा करून तपास सुरू केला. तपासादरम्यान मठ परिसरातील सीसीटीव्ही फुटेजची पाहणी करण्यात आली असता चोरीचा संपूर्ण प्रकार कॅमेऱ्यात कैद झाल्याचे समोर आले.
या सीसीटीव्ही फुटेजच्या आधारे पोलिसांनी अज्ञात आरोपीचा शोध सुरू केला असून, लवकरच त्याला अटक करण्यात येईल, असा विश्वास तपास यंत्रणेकडून व्यक्त करण्यात येत आहे.
धार्मिक स्थळातील दानपेटीवरच चोरट्यांनी डल्ला मारल्याने भाविकांमध्ये तीव्र नाराजी व्यक्त होत आहे. या घटनेमुळे मंदिर आणि मठ परिसरातील सुरक्षेचा प्रश्न पुन्हा एकदा ऐरणीवर आला असून, धार्मिक स्थळांवरील सुरक्षा व्यवस्था अधिक मजबूत करण्याची मागणी भाविकांकडून होत आहे.
या प्रकरणाचा पुढील तपास पारवा पोलीस ठाण्याचे ठाणेदार हेमंत चौधरी यांच्या मार्गदर्शनाखाली सहाय्यक पोलीस निरीक्षक गोपाल राठोड करीत आहेत. सीसीटीव्ही फुटेजच्या आधारे आरोपीचा माग काढण्याचे प्रयत्न सुरू असून, या चोरीमागील नेमके कारण आणि आरोपीची ओळख लवकरच स्पष्ट होण्याची शक्यता आहे.
