बाळापूरमध्ये तरुणीच्या मृत्यूनंतर संताप; फरार पोलीस कर्मचाऱ्याच्या अटकेसाठी रस्ता रोको आंदोलन

लग्नाचे आमिष दाखवून शोषणाचा आरोप; आरोपीला तातडीने अटक, फास्ट ट्रॅक न्यायालयात खटला चालवण्याची मागणी

अकोला | प्रतिनिधी

अकोला जिल्ह्यातील बाळापूर येथे एका तरुणीच्या मृत्यूनंतर परिसरात तीव्र संतापाचे वातावरण निर्माण झाले आहे. लग्नाचे आमिष दाखवून शारीरिक आणि आर्थिक शोषण केल्याचा आरोप असलेला पोलीस कर्मचारी अद्याप फरार असल्याचा आरोप करत नागरिकांनी आणि विविध संघटनांच्या पदाधिकाऱ्यांनी रस्ता रोको आंदोलन केले. आरोपीला तातडीने अटक करून या प्रकरणाचा खटला फास्ट ट्रॅक न्यायालयात चालविण्याची मागणी आंदोलनकर्त्यांनी केली.

मिळालेल्या माहितीनुसार, बाळापूर पोलीस ठाण्यात कार्यरत असलेले पवन वडगावे या पोलीस कर्मचाऱ्यावर घरमालकाच्या मुलीला लग्नाचे आमिष दाखवून तिचे शारीरिक आणि आर्थिक शोषण केल्याचा आरोप आहे.

तक्रारीनुसार, आरोपीने लग्नास नकार दिल्यानंतर संबंधित तरुणीने आत्महत्येचा प्रयत्न केला. उपचारादरम्यान तिचा मृत्यू झाला, अशी माहिती समोर आली आहे.

या घटनेनंतर आरोपी अद्याप फरार असल्याचा आरोप करत नागरिक, सामाजिक कार्यकर्ते आणि विविध राजकीय पक्षांच्या कार्यकर्त्यांनी बाळापूरमध्ये मोर्चा काढला. त्यानंतर अकोला नाका परिसरात सुमारे एक तास रस्ता रोको आंदोलन करण्यात आले.

आंदोलनस्थळी खासदार अनुप धोत्रे यांनी भेट देऊन पीडित कुटुंबीयांची विचारपूस केली. आरोपीला तातडीने अटक करण्यासाठी प्रयत्न केले जातील, तसेच या प्रकरणाचा खटला फास्ट ट्रॅक न्यायालयात चालविण्यासाठी पाठपुरावा केला जाईल आणि पीडित कुटुंबाला आवश्यक कायदेशीर मदत उपलब्ध करून दिली जाईल, असे आश्वासन त्यांनी दिले.

दरम्यान, पोलिसांनी आरोपीच्या शोधासाठी विशेष तीन पथके नियुक्त केली असून फरार आरोपीला लवकरच अटक करून कायद्यानुसार कठोर कारवाई करण्यात येईल, अशी माहिती अधिकृत सूत्रांनी दिली आहे.

या प्रकरणाचा तपास सुरू असून, प्रकरणातील सर्व आरोपांची सत्यता तपास आणि न्यायालयीन प्रक्रियेनंतरच स्पष्ट होणार आहे. तोपर्यंत या प्रकरणातील आरोप हे संबंधित तक्रारींवर आधारित असल्याचे मानले जात आहे.