रामटेकमध्ये रस्ते कामादरम्यान भीषण अपघात; ट्रकच्या चाकाखाली येऊन मजुराचा मृत्यू

मुरूम टाकण्यासाठी रिव्हर्स घेत असलेल्या ट्रकखाली सापडून जागीच मृत्यू; पोलिसांकडून तपास सुरू

रामटेक | प्रतिनिधी

नागपूर जिल्ह्यातील रामटेक तालुक्यात रस्ते बांधकामाच्या कामादरम्यान झालेल्या भीषण अपघातात एका मजुराचा ट्रकच्या चाकाखाली येऊन जागीच मृत्यू झाला. ही घटना रामटेक–मौदा मार्गावरील नेरला गाव शिवारात मध्यरात्री घडली असून, या अपघातामुळे कामाच्या ठिकाणी सुरक्षेच्या उपाययोजनांबाबत पुन्हा एकदा प्रश्नचिन्ह निर्माण झाले आहे.

पोलिसांनी दिलेल्या माहितीनुसार, रामटेक–मौदा मार्गावर रस्ते बांधकामाचे काम सुरू होते. या कामासाठी मुरूमाने भरलेला MH-31 FC-7476 क्रमांकाचा ट्रक मध्यरात्री सुमारे १ ते १.३० वाजण्याच्या दरम्यान मुरूम टाकण्यासाठी घटनास्थळी आला होता.

यावेळी नरेश सुखदेव बसीने (वय ४०, रा. आजनी, ता. रामटेक) हे ट्रक अनलोड करण्याच्या कामावर कार्यरत होते. प्राथमिक माहितीनुसार, ते मुरूम टाकण्याच्या जागीच झोपले होते. ट्रक चालकाला त्यांची उपस्थिती लक्षात न आल्याने वाहन रिव्हर्स घेताना ट्रक त्यांच्या अंगावरून गेला.

या भीषण अपघातात नरेश बसीने यांचा जागीच मृत्यू झाला. घटनेची माहिती मिळताच रामटेक पोलिसांनी घटनास्थळी धाव घेऊन पंचनामा केला. मृतदेह शवविच्छेदनासाठी उपजिल्हा रुग्णालय, रामटेक येथे पाठविण्यात आला आहे.

या प्रकरणी अपघाताची नोंद करण्यात आली असून, नेमकी घटना कशी घडली, तसेच संबंधित निष्काळजीपणाची जबाबदारी निश्चित करण्याच्या दृष्टीने रामटेक पोलीस पुढील तपास करत आहेत.

दरम्यान, या दुर्घटनेमुळे रस्ते बांधकामासारख्या धोकादायक कामांदरम्यान मजुरांच्या सुरक्षिततेसाठी आवश्यक नियमांचे काटेकोर पालन होत आहे का, याबाबत पुन्हा एकदा चर्चा सुरू झाली आहे.