नागपूर गुन्हे शाखेची मोठी कारवाई; ५० किलो ५६० ग्रॅम गांजा जप्त

२७.७९ लाखांचा मुद्देमाल हस्तगत; एक आरोपी अटकेत, ओडिशातील संशयिताचा शोध सुरू

नागपूर | प्रतिनिधी

नागपूर गुन्हे शाखेच्या अमली पदार्थ विरोधी पथकाने अमली पदार्थ तस्करांविरोधात मोठी कारवाई करत ५० किलो ५६० ग्रॅम गांजा जप्त केला आहे. या कारवाईत गांजासह सहा चाकी ट्रक आणि मोबाईल फोन असा एकूण २७ लाख ७९ हजार रुपयांचा मुद्देमाल जप्त करण्यात आला असून एका आरोपीला अटक करण्यात आली आहे. या प्रकरणातील आणखी एका संशयिताचा पोलीस शोध घेत आहेत.

माहितीनुसार, नागपूर गुन्हे शाखेच्या अमली पदार्थ विरोधी पथकाचे अधिकारी नियमित गस्त घालत असताना भंडारा–नागपूर राष्ट्रीय महामार्गावरील उमिया कॉम्प्लेक्सजवळ एक संशयास्पद ट्रक आढळून आला. चालकाच्या हालचाली संशयास्पद वाटल्याने पोलिसांनी एनडीपीएस कायद्यातील सर्व नियमांचे पालन करत दोन पंचांच्या उपस्थितीत ट्रकची झडती घेतली.

झडतीदरम्यान ट्रकच्या केबिनमध्ये लपवून ठेवलेला ५० किलो ५६० ग्रॅम गांजा आढळून आला. त्यानंतर पोलिसांनी गांजा, सहा चाकी अशोक लेलँड ट्रक आणि मोबाईल फोन असा एकूण २७ लाख ७९ हजार रुपयांचा मुद्देमाल जप्त केला.

या प्रकरणी मोहम्मद अलाउद्दीन मोहम्मद जमालुद्दीन शराफत अली मलिक (वय ४०, रा. कपिलनगर, नागपूर) याला अटक करण्यात आली आहे. तपासादरम्यान या अमली पदार्थ तस्करीमध्ये ओडिशा राज्यातील संबलपूर येथील एका संशयिताचा सहभाग समोर आला असून त्याचा शोध सुरू आहे.

या प्रकरणी पार्डी पोलीस ठाण्यात एनडीपीएस कायद्यान्वये गुन्हा दाखल करण्यात आला आहे. जप्त करण्यात आलेला गांजा कुठून आणण्यात आला होता, तो कुठे पोहोचविण्यात येणार होता आणि या तस्करीमागे मोठे रॅकेट कार्यरत आहे का, याचा सखोल तपास नागपूर गुन्हे शाखेकडून सुरू आहे.

अमली पदार्थांविरोधातील या कारवाईमुळे तस्करांना मोठा धक्का बसला असून, शहरातील अमली पदार्थांच्या अवैध तस्करीवर अंकुश आणण्यासाठी अशा कारवाया पुढेही सुरू राहणार असल्याचे पोलिसांनी स्पष्ट केले आहे.