अमरावतीत ६५ वर्षीय वृद्धाची निर्घृण हत्या; गोपाल नगर परिसरात खळबळ, आरोपीचा शोध सुरू
अमरावती शहरात पुन्हा एकदा खळबळ उडवणारी हत्या समोर आली आहे. गोपाल नगर परिसरातील सुतगीरनीजवळ एका ६५ वर्षीय वृद्धाची निर्घृण हत्या करण्यात आल्याची धक्कादायक घटना उघडकीस आली आहे. रात्रीच्या अंधारात अज्ञात आरोपीने हा रक्तरंजित प्रकार घडवून आणला आणि घटनास्थळावरून फरार झाला. या घटनेमुळे परिसरात भीतीचे वातावरण निर्माण झाले असून राजापेठ पोलिसांनी तपासाची चक्रे वेगाने फिरवण्यास सुरुवात केली आहे.
मिळालेल्या माहितीनुसार, अमरावतीच्या गोपाल नगर परिसरातील सुतगीरनीजवळ एका वृद्धाचा मृतदेह आढळून आल्याने परिसरात एकच खळबळ उडाली. मृत व्यक्तीची ओळख माणिक बळीराम बोरकर (वय ६५ वर्षे), व्यवसाय मजुरी, रा. गोदावरी कॉलनी, अमरावती अशी करण्यात आली आहे.
प्राथमिक माहितीनुसार, उशिरा रात्री अज्ञात आरोपीने माणिक बोरकर यांच्यावर जीवघेणा हल्ला केला. या हल्ल्यात त्यांचा मृत्यू झाला असून आरोपी घटनास्थळावरून फरार झाला आहे.
घटनेची माहिती मिळताच राजापेठ पोलिसांनी तातडीने घटनास्थळी धाव घेतली. पोलिसांनी परिसराची पाहणी करून पंचनामा केला तसेच मृतदेह शवविच्छेदनासाठी पाठविण्यात आला.
हत्येमागील नेमके कारण अद्याप स्पष्ट झालेले नसून पोलिसांकडून सर्व शक्यतांच्या आधारे तपास सुरू आहे. परिसरातील सीसीटीव्ही कॅमेऱ्यांचे फुटेज तपासण्यात येत असून संशयितांच्या हालचालींचा माग काढण्याचे प्रयत्न सुरू आहेत.
या धक्कादायक घटनेमुळे गोपाल नगर आणि परिसरातील नागरिकांमध्ये भीतीचे वातावरण निर्माण झाले आहे. वाढत्या गुन्हेगारीच्या घटनांमुळे कायदा आणि सुव्यवस्थेबाबत नागरिकांमध्ये चिंता व्यक्त केली जात आहे.
राजापेठ पोलिसांनी आरोपीचा शोध घेण्यासाठी विशेष पथके तयार केली असून या प्रकरणाचा लवकरात लवकर उलगडा करण्यासाठी तपास वेगाने सुरू असल्याची माहिती देण्यात आली आहे.
गोपाल नगरमधील या हत्येमागचे कारण काय, आरोपी कोण आणि हा हल्ला पूर्ववैमनस्यातून झाला की अन्य कोणत्या कारणामुळे, याचा तपास आता राजापेठ पोलीस करत आहेत. या प्रकरणातील प्रत्येक घडामोडीकडे संपूर्ण शहराचे लक्ष लागले आहे.
