बुलढाण्यात ‘मिशन परिवर्तन’चा धडाका! शेगावात २० किलो गांजा जप्त; दोघांना अटक
SP निलेश तांबे यांच्या निर्देशानुसार स्थानिक गुन्हे शाखेची कारवाई; १०.९६ लाखांचा मुद्देमाल जप्त, गांजाच्या पुरवठा साखळीचा शोध सुरू
बुलढाणा जिल्ह्यात अमली पदार्थांच्या अवैध व्यवसायाविरोधात पोलिसांनी कारवाईचा वेग वाढवला असून, पोलीस अधीक्षक निलेश तांबे यांच्या निर्देशानुसार राबविण्यात येणाऱ्या ‘मिशन परिवर्तन’अंतर्गत शेगाव परिसरात मोठी कारवाई करण्यात आली आहे. स्थानिक गुन्हे शाखेच्या पथकाने शेगाव–खामगाव मार्गावरील सवर्णा शिवारातील यश ढाब्याजवळ सापळा रचून २० किलो ५६० ग्रॅम गांजा जप्त केला. या कारवाईत दोन आरोपींना अटक करण्यात आली असून, गांजा, दोन दुचाकी आणि दोन मोबाईल असा एकूण १० लाख ९६ हजार रुपयांचा मुद्देमाल पोलिसांनी जप्त केला आहे. या कारवाईमुळे जिल्ह्यातील अमली पदार्थांच्या अवैध व्यवहारांचा मुद्दा पुन्हा ऐरणीवर आला आहे.
१८ ऑक्टोबर रोजी मिळालेल्या गोपनीय माहितीच्या आधारे पोलिसांनी सवर्णा शिवारातील यश ढाब्याजवळ कारवाई केली. यावेळी हुसेन खान युसूफ खान (वय २५) आणि आसिफ खान एजान खान (वय २९), दोघेही रा. शेगाव, यांना ताब्यात घेण्यात आले. त्यांच्याकडून २० किलो ५६० ग्रॅम गांजा जप्त करण्यात आला. जप्त केलेल्या गांजाची किंमत १० लाख २६ हजार रुपये असल्याचे सांगण्यात आले आहे. याशिवाय दोन दुचाकी आणि दोन मोबाईल फोनही पोलिसांनी जप्त केले. या प्रकरणी दोघांविरुद्ध अमली पदार्थ प्रतिबंधक कायद्यान्वये (NDPS Act) गुन्हा दाखल करण्यात आला आहे.
जिल्ह्यात अमली पदार्थांची अवैध विक्री आणि तस्करी रोखण्यासाठी पोलीस अधीक्षक निलेश तांबे यांनी विशेष लक्ष केंद्रित केले आहे. गोपनीय माहितीचे संकलन, स्वतंत्र पथकांची नियुक्ती आणि संशयित हालचालींवर लक्ष ठेवून प्रत्यक्ष कारवाई करण्यावर पोलिसांचा भर असल्याचे या कारवाईतून दिसून येते. ‘मिशन परिवर्तन’अंतर्गत अशा अवैध धंद्यांविरोधात सातत्याने कारवाई होण्याची अपेक्षा व्यक्त होत आहे.
पोलीस अधीक्षक निलेश तांबे यांच्या आदेशानुसार, अपर पोलीस अधीक्षक अमोल गायकवाड (बुलढाणा) आणि अपर पोलीस अधीक्षक पियुष जगताप (खामगाव) यांच्या मार्गदर्शनाखाली ही कारवाई करण्यात आली. स्थानिक गुन्हे शाखेचे पोलीस निरीक्षक हेमंत ठाकरे यांच्या नेतृत्वाखाली सहायक पोलीस निरीक्षक यशोदा कणसे, पोलीस हेडकॉन्स्टेबल राजेंद्र टेकाळ, अनुपकुमार मेहेर, विजय वारुळे, पोलीस कॉन्स्टेबल मंगेश सनगाळे, अमोल वनारे, मनोज खरडे, सतीश नाटेकर, चालक सहायक फौजदार विकास देशमुख, चालक पोलीस हेडकॉन्स्टेबल समाधान टेकाळे आणि तांत्रिक विश्लेषण विभागाचे पोलीस कॉन्स्टेबल कैलास ठोंबरे यांनी या कारवाईत सहभाग घेतला.
शेगाव परिसरात गांजा नेमका कुठून आणण्यात आला होता, त्याचा पुढील पुरवठा कोणाला केला जाणार होता आणि या व्यवहारामागे आणखी कोणी सहभागी आहे का, या प्रश्नांची उत्तरे तपासातून समोर येण्याची शक्यता आहे. या प्रकरणाचा पुढील तपास शेगाव ग्रामीण पोलीस करीत आहेत. त्यामुळे अमली पदार्थांच्या संभाव्य पुरवठा साखळीतील अन्य व्यक्तींचा सहभाग उघड होतो का, याकडे लक्ष लागले आहे.
