कामरगावात दुर्मिळ दृश्य; प्रणयराधनेत मग्न दोन साप पाहण्यासाठी नागरिकांची गर्दी
वाशीम जिल्ह्यातील कारंजा तालुक्यातील कामरगाव येथे एक दुर्मिळ आणि कुतूहल निर्माण करणारी घटना समोर आली आहे. देशमुख नगर परिसरात आज सकाळी दोन साप प्रणयराधनेत मग्न अवस्थेत दिसून आल्याने नागरिकांमध्ये उत्सुकता आणि भीतीचे वातावरण निर्माण झाले. भरवस्तीत घडलेल्या या प्रकारामुळे परिसरात मोठी गर्दी झाली असून अनेकांनी या दुर्मिळ दृश्याचे मोबाईलमध्ये चित्रीकरण केले.
मिळालेल्या माहितीनुसार, कामरगावातील देशमुख नगर परिसरात सकाळच्या सुमारास दोन साप एकत्र दिसून आले. सापांची प्रणयराधना सुरू असल्याचे लक्षात येताच ही माहिती परिसरात वेगाने पसरली. काही वेळातच नागरिकांनी घटनास्थळी गर्दी केली. अनेकांनी सुरक्षित अंतरावरून हे दृश्य पाहिले, तर काहींनी त्याचे व्हिडिओ आणि छायाचित्रे आपल्या मोबाईलमध्ये टिपली.
या घटनेमुळे काही नागरिकांमध्ये कुतूहल निर्माण झाले असले तरी अनेकांनी भीतीही व्यक्त केली. स्थानिकांच्या म्हणण्यानुसार, परिसरात मोठ्या प्रमाणात वाढलेले गवत, झुडपे आणि साचलेले सांडपाणी यामुळे सापांसह इतर विषारी जीवांचा वावर वाढला आहे. त्यामुळे लहान मुले, ज्येष्ठ नागरिक आणि रहिवाशांच्या सुरक्षेचा प्रश्न निर्माण होत असल्याची चिंता व्यक्त करण्यात आली.
नागरिकांनी ग्रामपंचायतीकडे तातडीने स्वच्छता मोहीम राबविण्याची मागणी केली आहे. परिसरातील वाढलेले गवत आणि झुडपे हटविणे, साचलेल्या सांडपाण्याचा निचरा करणे तसेच विषारी प्राण्यांचा वावर रोखण्यासाठी आवश्यक उपाययोजना कराव्यात, अशी मागणी स्थानिकांनी केली आहे.
कामरगावातील या दुर्मिळ घटनेमुळे परिसरात चर्चेला उधाण आले असून पर्यावरणातील बदल, अस्वच्छता आणि वाढता सापांचा वावर या मुद्द्यांकडेही लक्ष वेधले गेले आहे. आता प्रशासन याकडे कितपत गांभीर्याने दखल घेते, याकडे नागरिकांचे लक्ष लागले आहे.
