जळगावात थरारक हिट अँड रन! १५ वर्षीय मुलाच्या भरधाव कारने ९ जणांना उडवले; चालक कार सोडून फरार
जळगाव : शहरातील रामानंदनगर परिसरात हिट अँड रनची धक्कादायक घटना घडल्याने एकच खळबळ उडाली आहे. भरधाव वेगाने धावणाऱ्या कारने रस्त्यावरून जाणाऱ्या नागरिकांना चिरडल्याने अनेक जण जखमी झाले आहेत. विशेष म्हणजे ही कार अवघ्या १५ वर्षीय अल्पवयीन मुलाकडून चालवली जात असल्याची प्राथमिक माहिती समोर आली असून या घटनेमुळे नागरिकांमध्ये संतापाची लाट उसळली आहे.
ही भीषण दुर्घटना गिरणा टाकी ते चर्चदरम्यानच्या वर्दळीच्या मार्गावर घडली. प्रत्यक्षदर्शींनी दिलेल्या माहितीनुसार, भरधाव वेगातील कार चालकाचे नियंत्रण सुटल्याने वाहनाने रस्त्यावरून जाणाऱ्या नागरिकांना आणि वाहनांना जोरदार धडक दिली. या अपघातात तब्बल नऊ जणांना धडक बसल्याची माहिती समोर आली असून त्यापैकी पाच जण जखमी झाले आहेत.
जखमींमध्ये दोन दाम्पत्यांसह एका तरुणाचा समावेश असून काहींना गंभीर दुखापत झाली आहे. इलेक्ट्रिक दुचाकीवरून प्रवास करणाऱ्या एका तरुणाच्या पायाला गंभीर दुखापत झाल्याचे सांगण्यात येत आहे. अपघातानंतर जखमींना तातडीने जवळच्या खासगी रुग्णालयात दाखल करण्यात आले असून त्यांच्यावर उपचार सुरू आहेत.
अपघातानंतर परिसरात मोठ्या प्रमाणात नागरिकांची गर्दी जमली. जखमींना मदत करण्यासाठी स्थानिक नागरिकांनी तत्काळ धाव घेतली. मात्र अपघातामुळे संतप्त झालेल्या नागरिकांचा रोष वाढत असल्याचे पाहून अल्पवयीन चालकाने कार घटनास्थळीच सोडून पलायन केल्याचे समोर आले आहे.
या घटनेनंतर अल्पवयीन मुलांकडून वाहन चालवण्याच्या वाढत्या प्रकारांवर पुन्हा एकदा प्रश्नचिन्ह निर्माण झाले आहे. एवढ्या कमी वयात वाहन हातात देणाऱ्या पालकांवर आणि संबंधितांवर कठोर कारवाई करण्यात यावी, अशी मागणी नागरिकांकडून होत आहे. निष्पाप नागरिकांच्या जीवाशी खेळणाऱ्या अशा प्रकारांना आळा घालण्यासाठी कठोर कायदेशीर उपाययोजना करण्याची गरज असल्याचे मतही व्यक्त केले जात आहे.
दरम्यान, पोलिसांनी घटनास्थळी धाव घेत तपास सुरू केला आहे. परिसरातील सीसीटीव्ही फुटेज, वाहनाची नोंदणी माहिती आणि प्रत्यक्षदर्शींचे जबाब यांच्या आधारे तपास करण्यात येत आहे. चालक आणि वाहनमालकाविरुद्ध मोटार वाहन कायद्यानुसार तसेच इतर संबंधित कलमांअंतर्गत कठोर कारवाई होण्याची शक्यता व्यक्त केली जात आहे.
या धक्कादायक घटनेमुळे जळगाव शहर हादरले असून नागरिकांमध्ये भीती आणि संतापाचे वातावरण निर्माण झाले आहे. पोलिसांकडून फरार अल्पवयीन चालकाचा शोध सुरू असून पुढील तपास सुरू आहे.
