वाशिम–कामठवाडा मार्गाची अक्षरशः चाळण; खड्ड्यांमुळे नागरिक त्रस्त, तातडीच्या दुरुस्तीची मागणी
वाशिम, प्रतिनिधी : विकासाच्या मोठ्या घोषणा केल्या जात असल्या तरी वाशिम ते कामठवाडा या महत्त्वाच्या मार्गाची अवस्था मात्र अत्यंत दयनीय झाली आहे. ठिकठिकाणी पडलेल्या मोठमोठ्या खड्ड्यांमुळे हा रस्ता अक्षरशः चाळणीसारखा बनला असून वाहनधारक, शालेय विद्यार्थी आणि शेतकऱ्यांचे दैनंदिन जीवन विस्कळीत झाले आहे.
वाशिम ते कामठवाडा हा परिसरातील चार गावांना जोडणारा महत्त्वाचा मार्ग आहे. मात्र सध्या या रस्त्यावरून प्रवास करणे धोकादायक ठरत असून अनेक ठिकाणी डांबराचा थर पूर्णपणे उखडून गेला आहे. परिणामी वाहनचालकांना खड्डे चुकवत जीव मुठीत धरून प्रवास करावा लागत आहे.
विशेषतः दुचाकीस्वारांसाठी हा मार्ग अधिक धोकादायक बनला आहे. लहान खड्ड्यांपासून ते मोठ्या खाचखळग्यांपर्यंत रस्त्याची अवस्था इतकी बिकट झाली आहे की अपघाताचा धोका सतत निर्माण होत आहे. शालेय विद्यार्थी, शेतकरी आणि व्यापारी यांना या दुरवस्थेमुळे मोठ्या अडचणींचा सामना करावा लागत आहे.
स्थानिक नागरिकांच्या म्हणण्यानुसार, या रस्त्याचे काम अनेक वर्षांपासून संथगतीने सुरू आहे. वारंवार मागणी करूनही काम पूर्ण होत नसल्याने ग्रामस्थांमध्ये तीव्र नाराजी आहे. पावसाळा तोंडावर आला असताना या खड्ड्यांमध्ये पाणी साचून परिस्थिती आणखी गंभीर होण्याची शक्यता व्यक्त केली जात आहे.
पावसाळ्यात या मार्गावर अपघातांचे प्रमाण वाढण्याची भीतीही नागरिकांनी व्यक्त केली आहे. त्यामुळे शासन आणि संबंधित विभागाने तातडीने लक्ष घालून रखडलेले काम पूर्ण करावे आणि रस्ता खड्डेमुक्त करावा, अशी जोरदार मागणी करण्यात येत आहे.
या रस्त्याच्या दुरवस्थेमुळे परिसरातील चार गावांतील नागरिक संतप्त झाले असून प्रशासनाने तातडीने उपाययोजना न केल्यास आंदोलन छेडण्याचा इशाराही काही ग्रामस्थांनी दिला आहे.
दरम्यान, या गंभीर प्रश्नावर प्रशासन नेमकी कोणती भूमिका घेते आणि प्रत्यक्षात कामाला गती मिळते का, याकडे संपूर्ण परिसराचे लक्ष लागले आहे.
