खुलताबाद-वेरूळवर ‘तिसऱ्या डोळ्याची’ करडी नजर; 132 AI CCTV कॅमेऱ्यांचे लोकार्पण
खुलताबादमध्ये 77, तर वेरूळमध्ये 55 अत्याधुनिक कॅमेरे; नियंत्रण कक्ष थेट पोलीस ठाण्यात सुरू
छत्रपती संभाजीनगर जिल्ह्यातील ऐतिहासिक आणि पर्यटनदृष्ट्या महत्त्वाच्या खुलताबाद आणि वेरूळ परिसरात सुरक्षा व्यवस्थेला मोठी बळकटी मिळाली आहे. जिल्हा नियोजन समितीच्या निधीतून खुलताबाद शहरात ७७ आणि वेरूळ परिसरात ५५ असे एकूण १३२ अत्याधुनिक AI-आधारित CCTV कॅमेरे बसवण्यात आले आहेत. या कॅमेऱ्यांच्या नियंत्रण कक्षाचे उद्घाटन पालकमंत्री संजय शिरसाट यांच्या हस्ते करण्यात आले.
पोलीस ठाण्यातून २४ तास थेट नजर
खुलताबाद पोलीस ठाण्यात आधुनिक नियंत्रण कक्ष उभारण्यात आला असून, येथून शहरातील आणि वेरूळ परिसरातील प्रत्येक हालचालीवर २४x७ लक्ष ठेवले जाणार आहे. त्यामुळे गुन्हेगारांच्या हालचालींवर प्रभावी नियंत्रण ठेवणे आणि संशयास्पद घटनांवर तात्काळ प्रतिसाद देणे शक्य होणार आहे.
पर्यटनस्थळांच्या सुरक्षेसाठी महत्त्वाचे पाऊल
भद्रा मारुती मंदिर, औरंगजेबाची कबर, विविध दर्गे, घृष्णेश्वर ज्योतिर्लिंग, वेरूळ लेणी आणि शहाजीराजे भोसले गढी या स्थळांमुळे या परिसरात दररोज हजारो भाविक आणि पर्यटकांची वर्दळ असते. त्यामुळे वाहतूक कोंडी, चोरी, पाकिटमारी आणि इतर अनुचित प्रकार रोखण्यासाठी ही यंत्रणा अत्यंत उपयुक्त ठरणार आहे.
११ ठिकाणी ध्वनीक्षेपण प्रणाली
CCTV कॅमेऱ्यांसोबतच महत्त्वाच्या ११ ठिकाणी सार्वजनिक सूचना प्रणाली (PA System) बसवण्यात आली आहे. याच्या माध्यमातून गर्दी नियंत्रण, वाहतूक सूचना आणि आपत्कालीन संदेश तात्काळ देणे शक्य होणार आहे.
गुन्हेगारीवर बसेल आळा
पोलीस अधिकाऱ्यांच्या मते, या प्रकल्पामुळे अवैध धंदे, घरफोड्या, चोरी आणि इतर गुन्हेगारी घटनांवर मोठ्या प्रमाणात आळा बसण्याची अपेक्षा आहे. तसेच गुन्ह्यांच्या तपासासाठीही तांत्रिक पुरावे उपलब्ध होणार आहेत.
मान्यवरांची उपस्थिती
या उद्घाटन कार्यक्रमाला सामाजिक न्याय मंत्री तथा पालकमंत्री संजय शिरसाट, मंत्री अतुल सावे, ग्रामीण पोलीस अधीक्षक विनयकुमार राठोड, सहाय्यक पोलीस अधीक्षक अपराजिता अग्निहोत्री, तहसीलदार संतोष गुट्टे, पोलीस निरीक्षक प्रशांत महाजन, नगराध्यक्ष अमीर पटेल यांच्यासह अनेक मान्यवर उपस्थित होते.
नागरिकांमध्ये समाधान
या प्रकल्पामुळे खुलताबाद आणि वेरूळ परिसरातील नागरिक, व्यापारी आणि पर्यटकांमध्ये सुरक्षिततेची भावना अधिक मजबूत झाली आहे. ऐतिहासिक शहरांवर आता ‘तिसऱ्या डोळ्याची’ करडी नजर राहणार असल्याने गुन्हेगारांना लपण्यासाठी जागाच उरणार नाही, अशी प्रतिक्रिया नागरिकांनी व्यक्त केली.
