नागपुरात प्लॉटच्या नावाखाली फसवणूक; 95 हजार उकळून दुसऱ्याच घराचा प्लॉट विकल्याचा आरोप
नागपुरात प्लॉट खरेदीचं स्वप्न पाहणाऱ्या एका नागरिकाची मोठी फसवणूक झाल्याचा धक्कादायक प्रकार समोर आला आहे. प्लॉट दाखवून पैसे उकळल्यानंतर प्रत्यक्ष जागेवर गेल्यावर तिथे आधीच दुसऱ्याच व्यक्तीचं घर उभं असल्याचं समोर आल्यानं खळबळ उडाली आहे. या प्रकरणी कलमना पोलिसांत फसवणुकीचा गुन्हा दाखल करण्यात आला असून तपास सुरू आहे.
मिळालेल्या माहितीनुसार, तक्रारदार गणेश केशव उमरेडकर (वय ५५, रा. प्रेमनगर, नागपूर) यांची प्लॉटच्या नावाखाली सुमारे ९५ हजार रुपयांची फसवणूक करण्यात आली. हा प्रकार कलमना परिसरातील सुवर्णा गृहनिर्माण को-ऑपरेटिव्ह हाउसिंग सोसायटीमध्ये घडला.
तक्रारदारांना प्लॉट क्रमांक ५५, सुमारे ६०० चौरस मीटर जागा असल्याचं सांगत संबंधित प्लॉट दाखवण्यात आला. कागदपत्रांच्या आधारे सौदा करण्यात आला आणि त्यांच्याकडून रक्कम उकळण्यात आली. मात्र, प्रत्यक्ष जागेवर पाहणीसाठी गेल्यानंतर तक्रारदारांना मोठा धक्का बसला. ज्या जागेचा प्लॉट विकला गेला होता, त्या ठिकाणी आधीच दुसऱ्याच व्यक्तीचं घर बांधलेलं असल्याचं दिसून आलं.
या प्रकरणात सोसायटीचे तत्कालीन अध्यक्ष (सध्या मृत) आणि विद्यमान अध्यक्ष विनोद पराते यांच्यावर गंभीर आरोप करण्यात आले आहेत. तक्रारीनुसार, बनावट कागदपत्रे तयार करून प्लॉट विक्री करण्यात आली. इतकंच नव्हे, तर फसवणुकीचा प्रकार उघडकीस आल्यानंतर तक्रारदारांना एक लाख रुपये देऊन प्रकरण मिटवण्याचा कथित प्रयत्नही करण्यात आल्याचा आरोप आहे.
या प्रकरणी कलमना पोलिसांनी फसवणुकीचा गुन्हा दाखल केला असून सध्या कागदपत्रांची तपासणी आणि व्यवहाराची सखोल चौकशी सुरू आहे. अद्याप या प्रकरणात कोणतीही अटक करण्यात आलेली नसली तरी तपासाच्या आधारे पुढील कारवाई होणार असल्याची माहिती पोलिसांकडून देण्यात आली आहे.
नागपुरातील हा प्रकार प्लॉट किंवा जमीन खरेदी करणाऱ्या प्रत्येकासाठी गंभीर इशारा मानला जात आहे. जमीन खरेदी करताना केवळ कागदपत्रांवर विश्वास न ठेवता प्रत्यक्ष जागेची पाहणी, मालकी हक्काची खातरजमा आणि कायदेशीर पडताळणी करणे किती महत्त्वाचे आहे, हे या घटनेतून पुन्हा एकदा स्पष्ट झाले आहे.
