वाशिममध्ये फिरती पासपोर्ट व्हॅन सेवा सुरू; २७ वर्षांनंतर नागरिकांना मोठा दिलासा
वाशिमकरांसाठी मोठी आनंदाची बातमी समोर आली आहे. तब्बल २७ वर्षांच्या प्रतीक्षेनंतर अखेर वाशिममध्ये फिरती पासपोर्ट व्हॅन सेवा सुरू करण्यात आली आहे. त्यामुळे आता नागरिकांना पासपोर्टसाठी इतर जिल्ह्यांमध्ये जाण्याची गरज उरणार नाही.
वाशिम जिल्ह्याची स्थापना होऊन २७ वर्षे पूर्ण झाली, मात्र या कालावधीत पासपोर्टसाठी स्थानिक सुविधा उपलब्ध नव्हती. परिणामी, नागरिकांना पासपोर्टसाठी नागपूर, अकोला किंवा हिंगोली येथे जावे लागत होते. यामुळे वेळ, पैसा आणि श्रम यांचा मोठा अपव्यय होत होता.
मात्र, खासदार संजय देशमुख यांच्या सातत्यपूर्ण पाठपुराव्यामुळे अखेर वाशिममध्ये फिरत्या पासपोर्ट व्हॅन सेवेची सुरुवात करण्यात आली. या सेवेचे उद्घाटन क्षेत्रीय पासपोर्ट अधिकारी समीर डफाडे यांच्या हस्ते करण्यात आले. यावेळी मोठ्या संख्येने नागरिक उपस्थित होते.
या फिरत्या पासपोर्ट व्हॅनमधून नागरिकांना नवीन पासपोर्टसाठी अर्ज करणे, जुन्या पासपोर्टचे नूतनीकरण करणे, तसेच आवश्यक कागदपत्रांची पडताळणी करणे, या सर्व प्रक्रिया एकाच ठिकाणी पूर्ण करता येणार आहेत.
विशेषतः ग्रामीण भागातील नागरिकांसाठी ही सेवा मोठा दिलासा देणारी ठरणार आहे. शासनाच्या सेवा थेट नागरिकांपर्यंत पोहोचवण्याच्या उद्दिष्टाला या उपक्रमामुळे चालना मिळणार आहे.
वाशिमकरांसाठी ही सेवा ऐतिहासिक ठरत असून, आता पासपोर्टसाठी भटकंती नाही, तर सेवा थेट आपल्या दारी उपलब्ध होणार आहे.
