अमरावती कोर्ट परिसरात वकिलावर हल्ला; अनैतिक संबंधांच्या वादातून मारहाणीचा आरोप
अमरावती कोर्ट परिसरात एका वकिलावर पीडित मुलीच्या नातेवाईकांकडून हल्ला करण्यात आल्याची घटना समोर आली आहे. या प्रकरणामुळे काही काळ परिसरात तणावाचे वातावरण निर्माण झाले होते.
मिळालेल्या माहितीनुसार, एडवोकेट अभिजीत शिंदे यांच्यावर मुलीच्या नातेवाईकांनी हल्ला केला. संबंधित वकिलाचे आधीच लग्न झालेले असतानाही त्यांचे दुसऱ्या एका मुलीसोबत संबंध असल्याची माहिती मुलीच्या कुटुंबीयांना मिळाली होती.
यापूर्वीही मुलीच्या नातेवाईकांनी अभिजीत शिंदे यांना समज देत त्या मुलीसोबतचा संपर्क तोडण्याचा इशारा दिला होता. मात्र, तरीही संपर्क सुरू असल्याचा आरोप करण्यात आला आहे.
याच कारणावरून दोन्ही बाजूंमध्ये वाद निर्माण झाला. हा वाद वाढत जाऊन अखेर कोर्ट परिसरातच हाणामारी झाली. संतप्त नातेवाईकांनी शिंदे यांच्यावर हल्ला केल्याचे सांगितले जात आहे.
या घटनेत एडवोकेट अभिजीत शिंदे जखमी झाले असून त्यांच्यावर उपचार सुरू आहेत. त्यांची प्रकृती स्थिर असल्याची माहिती मिळत आहे.
घटनेनंतर पोलिसांनी तातडीने घटनास्थळी धाव घेतली आणि परिस्थिती नियंत्रणात आणली. या प्रकरणाची नोंद करण्यात आली असून, नेमकी घटना काय घडली याचा तपास पोलिसांकडून सुरू आहे.
या घटनेमुळे कोर्ट परिसरातील सुरक्षेचा मुद्दा पुन्हा एकदा चर्चेत आला आहे.
