जालना जिल्ह्यात समृद्धी महामार्गावर भीषण अपघात; ६ महिला मजुरांचा जागीच मृत्यू, ६ गंभीर जखमी
महाराष्ट्रातील जालना जिल्ह्यात बुधवारी समृद्धी महामार्गावर अत्यंत भीषण आणि हृदयद्रावक अपघात घडला. भरधाव ट्रकने रस्त्यावर काम करणाऱ्या महिला मजुरांना चिरडल्याने ६ जणींचा जागीच मृत्यू झाला, तर ६ महिला गंभीर जखमी झाल्या आहेत.
मिळालेल्या माहितीनुसार, समृद्धी महामार्गावर मोठ्या प्रमाणात काम सुरू असताना हा अपघात घडला. नागपूरहून मुंबईकडे जाणारा ट्रक अचानक नियंत्रण सुटून कामात गुंतलेल्या महिला मजुरांवरून गेला. या दुर्घटनेत अनेक महिला मजूर गंभीर जखमी झाल्या असून त्यांच्यावर तातडीने रुग्णालयात उपचार सुरू आहेत.
घटनास्थळी महिलांचे मृतदेह रस्त्याच्या कडेला पडलेले पाहून परिसरात एकच खळबळ उडाली. स्थानिक नागरिकांनी तात्काळ मदतकार्य सुरू करत जखमींना रुग्णालयात हलवले. अपघाताची माहिती मिळताच पोलिस व ॲम्ब्युलन्स तातडीने घटनास्थळी दाखल झाले.
या अपघातात ट्रक चालकही जखमी झाला असून प्राथमिक माहितीनुसार, ट्रकने आधी एका पिकअप वाहनाला धडक दिल्यानंतर हा भीषण प्रकार घडल्याचे सांगितले जात आहे. जखमींची प्रकृती चिंताजनक असल्याने मृतांचा आकडा वाढण्याची भीती व्यक्त केली जात आहे.
स्थानिक आमदार अर्जुन खोटकर यांनी मृतांच्या कुटुंबियांना मदत मिळावी यासाठी नगरविकास मंत्रालयाकडे मागणी केली आहे. या घटनेमुळे नागरिकांमध्ये तीव्र संताप व्यक्त केला जात असून संबंधितांवर कठोर कारवाईची मागणी होत आहे.
पोलीसांनी घटनास्थळाचा पंचनामा करून अपघाताच्या कारणांचा सखोल तपास सुरू केला आहे. समृद्धी महामार्गावरील सुरक्षाव्यवस्थेवरही प्रश्नचिन्ह उपस्थित होत आहे.
