पेट्रोल टंचाईत ‘देसी जुगाड’; बाईक सोडून घोड्यावरून ऑफिसला पोहोचला बँक कर्मचारी
देशभरात इंधन टंचाईच्या चर्चांदरम्यान मध्य प्रदेशातील देवास जिल्ह्यातून एक अनोखा प्रकार समोर आला आहे. पेट्रोल न मिळाल्याने एका बँक कर्मचाऱ्याने थेट बाईक सोडून घोड्यावरून ऑफिस गाठल्याचे पाहायला मिळाले.
मिळालेल्या माहितीनुसार, संबंधित युवक आपल्या बुलेट बाईकला पेट्रोल भरण्यासाठी पंपावर गेला होता. मात्र, तेथे मोठी गर्दी आणि पेट्रोल न मिळाल्यामुळे त्याला रिकाम्या हाताने परत यावे लागले. वेळ वाया जाऊ नये म्हणून त्याने अनोखा निर्णय घेत घोड्यावरूनच कार्यालयात जाण्याचा पर्याय निवडला.
शहराच्या रस्त्यावर घोड्यावरून प्रवास करताना या युवकाकडे पाहून नागरिक आश्चर्यचकित झाले. अनेकांनी या अनोख्या दृश्याचा व्हिडिओ काढून सोशल मीडियावर शेअर केला, जो आता मोठ्या प्रमाणात व्हायरल होत आहे.
एकीकडे पेट्रोल टंचाईमुळे नागरिक त्रस्त असताना, या बँक कर्मचाऱ्याने शोधलेला ‘देसी जुगाड’ चर्चेचा विषय ठरला आहे. सोशल मीडियावरही त्याच्या कल्पकतेचे कौतुक केले जात असून, अनेकांनी याला संकटातही मार्ग काढण्याचे उत्तम उदाहरण म्हटले आहे.
सध्या पेट्रोल पंपांवरील लांबच लांब रांगांच्या पार्श्वभूमीवर हा व्हिडिओ लोकांना केवळ आश्चर्यचकित करत नाही, तर थोडंसं हसूही देत आहे.
