तऱ्हाळा यात्रा महोत्सवात राम–भरत भेटीचा सोहळा आणि रावण–कुंभकर्ण दहन; १५१ वर्षांच्या परंपरेचे भाविक साक्षीदार

वाशिम — मंगरुळपीर तालुक्यातील तऱ्हाळा गावातील श्री संत भायजी महाराजांच्या यात्रेमध्ये यंदा भक्ती, परंपरा आणि उत्साहाचा संगम पाहायला मिळाला. १५१ वर्षांपासून सुरू असलेल्या या धार्मिक परंपरेतील सर्वात महत्त्वाचा क्षण — राम–भरत भेटीचा ऐतिहासिक सोहळा — आज पहाटे संपन्न झाला.

गेल्या सात दिवसांपासून भक्तिभावाने नटलेल्या या यात्रेला आज अखेरचा दिवस होता. पहाटे ५ वाजता हजारो भाविकांच्या उपस्थितीत प्रभू श्रीराम आणि भरत यांची भेट पारंपरिक पद्धतीने पार पडली. भाविकांनी जयघोषात हा पवित्र क्षण अनुभवला.

अधर्मावर धर्माचा विजय : रावण–कुंभकर्ण दहन

राम–भरत भेटीनंतर यात्रा महोत्सवात रावण आणि कुंभकर्ण यांच्या भव्य पुतळ्यांचे दहन करण्यात आले. अत्याचारावर संयमाचा, असत्यावर सत्याचा आणि अधर्मावर धर्माचा विजय दर्शवणारा हा सोहळा पाहण्यासाठी भाविकांची प्रचंड गर्दी झाली.

या दहन सोहळ्याच्या वेळी संपूर्ण परिसर जय जय राम, जय श्रीरामच्या घोषणांनी दुमदुमून गेला.

ग्रामीण भागातील सर्वात जुनी धार्मिक परंपरा

तऱ्हाळा यात्रा ही ग्रामीण भागातील सर्वात जुनी आणि श्रद्धेने नटलेली धार्मिक परंपरा मानली जाते. या यात्रेमुळे परिसरात एक पवित्र, आध्यात्मिक आणि उत्साहवर्धक वातावरण निर्माण झाले होते.

यात्रेच्या सांगतेनिमित्त हजारो भाविकांनी महाप्रसादाचा लाभ घेतला आणि १५१ वर्षांच्या या दैदिप्यमान परंपरेचे प्रत्यक्ष साक्षीदार झाले.