येमेनच्या किनाऱ्यावर भीषण दुर्घटना: १५४ पैकी ६८ स्थलांतरितांचा मृत्यू, ७४ जण बेपत्ता

पुणे:-येमेनच्या अबयान किनाऱ्याजवळ रविवारी पहाटे स्थलांतरितांनी भरलेली एक बोट उलटून मोठी दुर्घटना घडली आहे. या अपघातात बोटीतील १५४ प्रवाशांपैकी किमान ६८ प्रवाशांचा दुर्दैवी मृत्यू झाला असून ७४ जण अद्यापही बेपत्ता आहेत. केवळ १२ जणांना या दुर्घटनेतून वाचवण्यात यश आले आहे. आंतरराष्ट्रीय स्थलांतर संघटनेने (IOM) या घटनेचे वर्णन अलीकडच्या काळातील सर्वात वाईट दुर्घटनांपैकी एक म्हणून केले आहे.

नेमकं काय घडलं?
स्थानिक अधिकाऱ्यांनी दिलेल्या माहितीनुसार, रविवारी (३ ऑगस्ट) पहाटे एडेनच्या आखातात १५४ स्थलांतरितांना घेऊन जाणारी ही बोट उलटली. या बोटीतील सर्व प्रवासी इथिओपियाचे नागरिक होते आणि ते येमेनमार्गे सौदी अरेबियामध्ये रोजगाराच्या शोधात निघाले होते. या घटनेनंतर खानफार जिल्ह्यात ५४ मृतदेह किनाऱ्यावर वाहून आले, तर १४ मृतदेह जिंजीबार शहरातील रुग्णालयात आणण्यात आले.

या भीषण अपघातातून केवळ १२ प्रवासी बचावले आहेत, ज्यात ९ इथिओपियन आणि येमेनी नागरिकांचा समावेश आहे. अपघातानंतर तातडीने मोठी शोधमोहीम राबवण्यात आली, परंतु बचाव पथकाला अनेक अडचणींचा सामना करावा लागत आहे. किनारपट्टीच्या विविध भागांमध्ये मृतदेह विखुरलेले आढळले असून, बेपत्ता झालेल्या ७४ जणांचा शोध घेण्याचे काम अजूनही सुरू आहे.

स्थलांतरितांच्या मार्गावरील धोके
आंतरराष्ट्रीय स्थलांतर संघटनेच्या आकडेवारीनुसार, २०२३ साली याच मार्गावर ५५८ प्रवाशांचा मृत्यू झाला होता. गेल्या १० वर्षांत २,०८२ हून अधिक स्थलांतरित बेपत्ता झाले आहेत. ही आकडेवारी स्थलांतरितांच्या जीवनातील धोके अधोरेखित करते. स्थलांतरितांना केवळ समुद्राच्या लाटांनाच तोंड द्यावे लागत नाही, तर येमेनमध्ये पोहोचल्यानंतर त्यांना तुरुंगवास आणि छळ यांसारख्या अनेक संकटांचा सामना करावा लागतो, असेही या संघटनेने म्हटले आहे.

सध्या स्थानिक प्रशासन आणि बचावपथकाकडून शोधमोहीम युद्धपातळीवर सुरू आहे, मात्र बेपत्ता झालेल्या ७४ जणांचे काय झाले, याबाबत अजूनही अनिश्चितता कायम आहे. या दुर्घटनेमुळे स्थलांतरितांच्या सुरक्षिततेचा प्रश्न पुन्हा एकदा ऐरणीवर आला आहे.