अखेर अजित पवारांमधील ‘दादा’ जागा झाला; सूरज चव्हाणांना राजीनामा देण्याचे आदेश

मुंबई : लातूर येथील पत्रकार परिषदेतील गोंधळानंतर छावा संघटनेचे प्रदेशाध्यक्ष विजय घाटगे यांना बेदम मारहाण करणारे राष्ट्रवादी युवक काँग्रेसचे प्रदेशाध्यक्ष आणि प्रवक्ते सूरज चव्हाण यांना पक्षाकडून दणका देण्यात आला आहे. राष्ट्रवादीचे अध्यक्ष आणि राज्याचे उपमुख्यमंत्री अजित पवार यांनी या घटनेवर नाराजी व्यक्त करत सूरज चव्हाण यांना आपल्या पदाचा राजीनामा देण्याच्या सूचना दिल्या आहेत. लातूरमधील घटनेमुळे पक्षाची प्रतिमा मलीन होत असल्याने ही अजित पवारांकडून ही कारवाई करण्यात आली आहे.

“काल लातूरमध्ये घडलेल्या अत्यंत गंभीर आणि निषेधार्ह घटनेच्या पार्श्वभूमीवर, मी राष्ट्रवादी युवक काँग्रेसचे प्रदेशाध्यक्ष सूरज चव्हाण यांना त्यांच्या पदाचा त्वरित राजीनामा द्यायच्या स्पष्ट सूचना दिल्या आहेत,” अशी माहिती अजित पवारांनी दिली आहे. तसंच पक्षाच्या मूल्यांच्या विरोधात जाऊन केले जाणारे वर्तन कोणत्याही स्थितीत स्वीकारले जाणार नाही, यासाठी हा कठोर निर्णय घेतला आहे, असंही अजित पवार म्हणाले.

अजित पवारांकडून पदाधिकाऱ्यांना स्पष्ट सूचना

लातूरमध्ये राष्ट्रवादी काँग्रेस आणि छावा संघटनेच्या कार्यकर्त्यांमध्ये झालेल्या वादावर अजित पवार यांनी नाराजी व्यक्त केली आहे. ही घटना गंभीर आणि निषेधार्ह असल्याचे ते म्हणाले. त्यांनी कार्यकर्त्यांना लोकशाही मार्गाने वागण्याचा सल्ला दिला आहे. अजित पवार म्हणाले, लातूरमध्ये राष्ट्रवादी काँग्रेस आणि छावा संघटनेच्या पदाधिकाऱ्यांमध्ये काल जी घटना घडली, ती अत्यंत गंभीर, दुर्दैवी आणि निषेधार्ह आहे. कोणत्याही प्रकारची हिंसा, असभ्य वर्तन किंवा असंसदीय भाषा त्यांना मान्य नाही, असे त्यांनी स्पष्ट केले. समाजातील प्रत्येक घटकाच्या न्याय्य मागण्यांचा आणि भावनांचा आम्ही मनापासून सन्मान करतो, असेही ते म्हणाले. अजित पवार यांनी कार्यकर्त्यांना समज देताना सांगितले की, “माझ्या सर्व सहकाऱ्यांनी सामाजिक जीवनात काम करताना नेहमी लोकशाही, शांतता आणि अहिंसा या मूल्यांना प्राधान्य द्या.”