वाशिममध्ये भव्य रथयात्रा; महिला, पुरुष आणि बालकांचा उत्स्फूर्त सहभाग, जयघोषाने शहर दुमदुमले
वाशिम जिल्ह्यात अग्रवाल समाजाच्या वतीने छत्रपती अग्रसेन महाराजांची ५१५० वी जयंती सप्ताह विविध सामाजिक, शैक्षणिक आणि सांस्कृतिक उपक्रमांनी मोठ्या उत्साहात साजरा करण्यात आला. संपूर्ण आठवडाभर आयोजित करण्यात आलेल्या विविध कार्यक्रमांमुळे समाजबांधवांमध्ये आनंदाचे आणि उत्साहाचे वातावरण पाहायला मिळाले.
जयंती सप्ताहानिमित्त महिला, पुरुष आणि बालकांसाठी विविध शैक्षणिक उपक्रम, खेळ, रांगोळी स्पर्धा, नृत्य स्पर्धा तसेच सांस्कृतिक कार्यक्रमांचे आयोजन करण्यात आले होते. या सर्व कार्यक्रमांना समाजबांधवांचा उत्स्फूर्त प्रतिसाद मिळाला. विविध उपक्रमांमधून सामाजिक एकोपा, सांस्कृतिक परंपरा आणि नव्या पिढीतील कलागुणांना प्रोत्साहन देण्यात आले.
रविवार, ११ ऑक्टोबर रोजी सकाळी ९.३० वाजता अग्रसेन भवन येथे ध्वजारोहण करून जयंती उत्सवाच्या मुख्य कार्यक्रमाला सुरुवात झाली. यानंतर छत्रपती अग्रसेन महाराजांची भव्य रथयात्रा संपूर्ण शहरातून काढण्यात आली. या रथयात्रेत शेकडो अग्रवाल समाजबांधवांनी उत्स्फूर्तपणे सहभाग घेतला.
रथयात्रा छत्रपती शिवाजी महाराज यांच्या पूर्णाकृती पुतळ्याजवळ पोहोचल्यानंतर अग्रवाल समाजबांधवांनी छत्रपती शिवाजी महाराजांना मानवंदना अर्पण केली आणि त्यांच्या पुतळ्याला पुष्पहार घातला. यावेळी महिला, पुरुष आणि लहान मुलांनी छत्रपती शिवाजी महाराज तसेच छत्रपती अग्रसेन महाराज यांच्या जयघोषाने परिसर दुमदुमून सोडला.
जयंती सप्ताह यशस्वी करण्यासाठी अग्रवाल समाज समितीचे राजकुमार अग्रवाल, संजय अग्रवाल, राजेश अग्रवाल, सविता अग्रवाल, पायल अग्रवाल, संगीता अग्रवाल, जीवन अग्रवाल, किसन अग्रवाल, प्रेरणा अग्रवाल, स्नेहा पोद्दार, विपुल अग्रवाल, कान्हा अग्रवाल, सुरेश भरूका, बद्री अग्रवाल, कैलाश अग्रवाल आणि रमण अग्रवाल यांच्यासह शेकडो समाजबांधवांनी परिश्रम घेतले.
विविध सामाजिक, शैक्षणिक आणि सांस्कृतिक उपक्रमांसह भव्य रथयात्रेचे आयोजन करून अग्रवाल समाजाने जयंती सप्ताह आनंदात आणि उत्साहात साजरा केला. या उत्सवातून समाजातील एकता, बंधुभाव आणि सांस्कृतिक परंपरांचे दर्शन घडले.
