अमरावतीच्या कुमकुम मोहोडची जपानमध्ये सुवर्णभरारी!
महिला रिकर्व्ह सांघिक प्रकारात सुवर्णपदक; एकेरीतही ऐतिहासिक गोल्ड जिंकत भारताचा गौरव
अमरावती : अमरावतीच्या क्रीडा क्षेत्रासाठी आजचा दिवस अभिमानाचा ठरला आहे. अमरावतीची गुणवान तिरंदाज कुमकुम अनिल मोहोड हिने जपानमध्ये सुरू असलेल्या आशियाई क्रीडा स्पर्धा २०२६ मध्ये दमदार कामगिरी करत भारताचा तिरंगा अभिमानाने उंचावला आहे.
महिला रिकर्व्ह सांघिक तिरंदाजी प्रकारात कुमकुम मोहोड, अंकिता भकत आणि कीर्ती शर्मा या भारतीय त्रिकुटाने ऐतिहासिक कामगिरी करत सुवर्णपदक पटकावले. भारतीय संघाने अंतिम सामन्यात दक्षिण कोरियाचा ५-३ असा पराभव करत या प्रकारातील भारताचे पहिले आशियाई क्रीडा स्पर्धेतील सुवर्णपदक जिंकले.
कुमकुमच्या या कामगिरीने अमरावतीच्या शिरपेचात आणखी एक मानाचा तुरा रोवला आहे. विशेष म्हणजे, कुमकुमने आज महिला एकेरी रिकर्व्ह प्रकारातही सुवर्णपदक पटकावत इतिहास रचला. अंतिम सामन्यात दक्षिण कोरियाच्या ओह ये-जिनविरुद्ध सामना ५-५ असा बरोबरीत राहिल्यानंतर शूट-ऑफमध्ये कुमकुमने अचूक १० गुणांचा निशाणा साधत सुवर्णपदकावर नाव कोरले.
या विजयासह कुमकुम ही आशियाई क्रीडा स्पर्धेच्या महिला एकेरी रिकर्व्ह प्रकारात सुवर्णपदक जिंकणारी पहिली भारतीय महिला तिरंदाज ठरली आहे. तसेच तिच्या या कामगिरीमुळे भारताला २०२८ लॉस एंजेलिस ऑलिम्पिकसाठी कोटा स्थानही मिळाले आहे.
कुमकुमच्या या यशामागे तिच्या सातत्यपूर्ण सरावासोबतच अमरावतीतील राधे आर्चरी अकॅडमी, जिल्हा क्रीडा कार्यालय आणि खेलो इंडिया सेंटर, तापोवन परिसर यांचे योगदान असल्याचे देण्यात आलेल्या माहितीत नमूद करण्यात आले आहे.
कुमकुमच्या या ऐतिहासिक कामगिरीमुळे अमरावतीचे नाव आंतरराष्ट्रीय क्रीडा पटलावर झळकले आहे. तिच्या यशाबद्दल अमरावतीकरांकडून कौतुकाचा वर्षाव होत असून, कुमकुमच्या पुढील क्रीडा कारकिर्दीसाठी शुभेच्छा दिल्या जात आहेत.
अमरावतीच्या आणखी एका खेळाडूची चमकदार कामगिरी
दरम्यान, अमरावतीचे यशदीप भोगे यांनीही आशियाई क्रीडा स्पर्धेतील पुरुष रिकर्व्ह सांघिक प्रकारात रौप्यपदक मिळवल्याची माहिती देण्यात आली आहे. त्यांच्या प्रशिक्षणाशी गणेश विश्वकर्मा आर्चरी अकॅडमी, न्यू गणेश कॉलनी, अमरावती यांचा संबंध असल्याचेही सांगण्यात आले आहे.
त्यामुळे अमरावतीच्या तिरंदाजी क्षेत्रासाठी आशियाई क्रीडा स्पर्धा २०२६ ही विशेष ठरली असून, कुमकुम मोहोड आणि यशदीप भोगे यांच्या कामगिरीने जिल्ह्याच्या क्रीडा क्षेत्राची राष्ट्रीय आणि आंतरराष्ट्रीय स्तरावर दखल घेतली गेली आहे.
