मस्जिदीत प्रार्थना करताना हृदयविकाराचा तीव्र झटका; डोणगावातील व्यक्तीचा मृत्यू

प्रार्थना सुरू असताना अचानक अस्वस्थ वाटल्याने मस्जिदीबाहेर आले; वजूच्या ठिकाणी कोसळले, नागरिकांनी CPR देत वाचवण्याचा प्रयत्न केला

डोणगाव, ता. मेहकर | प्रतिनिधी : गजानन राऊत, बुलढाणा

डोणगाव येथे सकाळच्या प्रार्थनेसाठी मस्जिदीत गेलेल्या एका व्यक्तीचा हृदयविकाराच्या तीव्र झटक्याने अचानक मृत्यू झाल्याची दुर्दैवी घटना १ ऑक्टोबर रोजी सकाळी साडेपाचच्या सुमारास घडली. आक्रम शहा हनीफ शहा ऊर्फ बालू असे मृत व्यक्तीचे नाव आहे. या घटनेमुळे डोणगाव परिसरात हळहळ व्यक्त होत आहे.

आक्रम शहा हनीफ शहा हे नेहमीप्रमाणे सकाळच्या प्रार्थनेसाठी स्थानिक मस्जिदीत गेले होते. प्रार्थना सुरू असतानाच त्यांना अचानक अस्वस्थ वाटू लागले. प्रकृती ठीक नसल्याचे जाणवल्याने ते मस्जिदीबाहेर आले आणि वजू करण्याच्या ठिकाणी जाऊन बसले.

याचदरम्यान त्यांना हृदयविकाराचा तीव्र झटका आला आणि ते अचानक खाली कोसळले. घटना लक्षात येताच मस्जिदीत आणि परिसरात उपस्थित नागरिकांनी तातडीने त्यांच्या मदतीसाठी धाव घेतली. नागरिकांनी त्यांना प्राथमिक स्वरूपात CPR अर्थात हृदयाचे पंपिंग तसेच कृत्रिम श्वास देऊन वाचवण्याचा प्रयत्न केला.

मात्र, नागरिकांनी केलेल्या प्रयत्नांना यश आले नाही. आक्रम शहा यांचा मृत्यू झाल्याचे स्पष्ट झाले. अचानक घडलेल्या या घटनेमुळे उपस्थित नागरिकांमध्ये काही काळ गोंधळाचे वातावरण निर्माण झाले.

आक्रम शहा यांच्या पश्चात पत्नी, दोन मुले, भाऊ आणि आई असा आप्त परिवार आहे. त्यांच्या आकस्मिक निधनाची बातमी डोणगावमध्ये पसरताच नातेवाईक, मित्रपरिवार आणि परिचितांनी त्यांच्या कुटुंबीयांप्रती शोक व्यक्त केला.

मस्जिदीत प्रार्थनेदरम्यान निधन झाल्याने मुस्लिम समाजात या घटनेकडे धार्मिक श्रद्धेच्या दृष्टीने पाहिले जात आहे. दरम्यान, आक्रम शहा यांच्या आकस्मिक निधनामुळे डोणगाव परिसरात शोककळा पसरली असून गावातून हळहळ व्यक्त होत आहे.

सिटी न्यूज | गजानन राऊत | बुलढाणा