धामणगाव रेल्वेत महालक्ष्मी गौरी पूजनाचा उत्साह शिगेला!
घराघरांत गौरी मातेचे भक्तिभावाने आगमन; पूजा-अर्चा, आरती आणि महाप्रसादामुळे शहर झाले भक्तिमय
धामणगाव रेल्वे | प्रतिनिधी
धामणगाव रेल्वे शहरात महालक्ष्मी गौरी पूजनाचा उत्साह शिगेला पोहोचला आहे. घराघरांत गौरी मातेचे भक्तिभावाने आगमन झाले असून, पूजा-अर्चा, आरती, नैवेद्य आणि महाप्रसादामुळे संपूर्ण शहरात भक्तिमय आणि मंगलमय वातावरण निर्माण झाले आहे.
महालक्ष्मी गौरीच्या आगमनानिमित्त महिलांनी घरांची आकर्षक सजावट करत सुंदर रांगोळ्या आणि फुलांची आरास केली. गौरी-महालक्ष्मीची पारंपरिक पद्धतीने स्थापना करून विधिवत पूजा-अर्चा करण्यात आली. देवीला विविध अलंकारांनी सजवून फळे, मिठाई तसेच पारंपरिक खाद्यपदार्थांचा नैवेद्य अर्पण करण्यात आला.
गौरी पूजनानिमित्त शहरातील अनेक घरांमध्ये आणि परिसरात आरती, भजन तसेच विविध धार्मिक कार्यक्रमांचे आयोजन करण्यात आले. महिला, पुरुष आणि लहान मुलांनी मोठ्या श्रद्धेने गौरी मातेचे दर्शन घेतले. हळदी-कुंकू आणि स्नेहभोजनाच्या माध्यमातून महिला तसेच नागरिकांनी सामाजिक आणि कौटुंबिक एकोपा जपला.
या धार्मिक सोहळ्याच्या निमित्ताने आयोजित करण्यात आलेल्या महाप्रसादाचा नागरिकांनी मोठ्या संख्येने लाभ घेतला. सुख, शांती, उत्तम आरोग्य आणि समृद्धीसाठी भाविकांनी महालक्ष्मी मातेच्या चरणी प्रार्थना केली.
गौरी मातेच्या आगमनाने धामणगाव रेल्वे शहरातील घराघरांत श्रद्धा, भक्ती आणि उत्साहाचे वातावरण निर्माण झाले आहे. महालक्ष्मी मातेच्या कृपेने सर्वांच्या जीवनात सुख, शांती, आरोग्य आणि समृद्धी नांदो, अशीच भावना भाविकांनी व्यक्त केली.
सिटी न्यूजसाठी प्रतिनिधी संतोष वाघमारे, धामणगाव रेल्वे.
