विहिंपच्या शोभायात्रेवरील पोलिस कारवाईवरून नागपुरात वाद

झांकीला सामाजिक तेढ निर्माण होत असल्याची नोटीस दिल्याचा विहिंपचा आरोप; कारवाई मागे न घेतल्यास तीव्र आंदोलनाचा इशारा

नागपूर | प्रतिनिधी

नागपुरात विश्व हिंदू परिषदेच्या शोभायात्रेवर झालेल्या कथित पोलिस कारवाईचा मुद्दा आता चांगलाच तापला आहे. राष्ट्रीय स्वयंसेवक संघाच्या शताब्दी वर्षानिमित्त तयार करण्यात आलेल्या झांकीला सामाजिक तेढ निर्माण होत असल्याची नोटीस देण्यात आल्याचा आरोप विश्व हिंदू परिषदेने केला आहे. या संपूर्ण प्रकरणावरून विहिंप आक्रमक झाली असून, कारवाई आणि नोटीस मागे न घेतल्यास तीव्र आंदोलन करण्याचा इशारा देण्यात आला आहे.

विश्व हिंदू परिषद स्थापना दिनानिमित्त नागपुरात शोभायात्रेचे आयोजन करण्यात आले होते. या शोभायात्रेवर सीताबर्डी पोलिसांनी गुन्हा दाखल केल्याचा आरोप विहिंपकडून करण्यात आला आहे.

विहिंपच्या म्हणण्यानुसार, बर्डी मेन रोडवर झोन दोनच्या सहाय्यक पोलीस आयुक्त अन्नपूर्णा सिंग यांनी मोबाईलच्या माध्यमातून डीजेचा आवाज तपासला. त्यानंतर शोभायात्रा थांबवण्याचा प्रयत्न करण्यात आला तसेच वाहनांच्या चाव्या काढण्यात आल्याचा दावा विहिंपने केला आहे.

कार्यकर्त्यांसोबत धक्काबुक्कीचा आरोप

शोभायात्रेदरम्यान पोलिस आणि कार्यकर्त्यांमध्ये वाद निर्माण झाला. यावेळी कार्यकर्त्यांसोबत धक्काबुक्की करण्यात आली आणि धमकी देण्यात आल्याचा आरोप विश्व हिंदू परिषदेने केला आहे.

या कारवाईवर आक्षेप घेत विहिंपने पोलिसांच्या भूमिकेवर प्रश्नचिन्ह उपस्थित केले आहे. सत्तापक्षाच्या दहीहंडी कार्यक्रमांमध्ये डीजे आणि लेझर लाईटचा वापर करण्यात आला होता, मात्र त्यावेळी अशाच प्रकारची कारवाई करण्यात आली नसल्याचा सवाल विहिंपने उपस्थित केला आहे.

आरएसएसच्या शताब्दी वर्षाच्या झांकीवरूनही वाद

दरम्यान, राष्ट्रीय स्वयंसेवक संघाच्या शताब्दी वर्षानिमित्त तयार करण्यात आलेल्या झांकीवरूनही वाद निर्माण झाला आहे. या झांकीच्या कारागिराला सामाजिक तेढ निर्माण केल्याच्या कारणावरून नोटीस देण्यात आल्याचा आरोप विहिंपने केला आहे.

या नोटीसमागील कारण आणि कारवाईची कायदेशीर प्रक्रिया याबाबतही विहिंपने प्रश्न उपस्थित केले आहेत. झांकी तयार करणाऱ्या कारागिरावर अशा स्वरूपाची कारवाई का करण्यात आली, याचे स्पष्टीकरण पोलिस प्रशासनाने द्यावे, अशी मागणी करण्यात आली आहे.

पोलीस आयुक्तांकडे तक्रार

विश्व हिंदू परिषदेच्या पदाधिकाऱ्यांनी संपूर्ण प्रकरणाची माहिती पोलीस आयुक्तांना दिल्याचे सांगण्यात आले आहे. संबंधित अधिकाऱ्यांवर कारवाई करावी, शोभायात्रेसंदर्भातील गुन्हा मागे घ्यावा तसेच झांकीच्या कारागिराला देण्यात आलेली नोटीस रद्द करावी, अशा मागण्या विहिंपकडून करण्यात आल्या आहेत.

मागण्या मान्य न झाल्यास आंदोलन आणखी तीव्र करण्याचा इशारा महानगर मंत्री अमोल ठाकरे यांनी दिला आहे. त्यामुळे या प्रकरणाला आता आंदोलनाचे स्वरूप येण्याची शक्यता आहे.

शोभायात्रेवरील कथित पोलिस कारवाई, डीजेच्या वापराबाबतची भूमिका आणि आरएसएसच्या शताब्दी वर्षानिमित्त तयार करण्यात आलेल्या झांकीला देण्यात आलेली नोटीस या मुद्द्यांवरून विहिंपने पोलिस प्रशासनाला घेरले आहे.

दरम्यान, विहिंपकडून करण्यात आलेल्या या आरोपांवर पोलीस प्रशासनाचे अधिकृत स्पष्टीकरण अद्याप समोर येणे बाकी आहे. त्यामुळे पोलिसांची नेमकी भूमिका काय आहे, संबंधित गुन्हा आणि नोटीस कोणत्या कायदेशीर आधारावर देण्यात आली, तसेच विहिंपच्या मागण्यांवर प्रशासन काय निर्णय घेते, याकडे आता नागपूरचे लक्ष लागले आहे.