डफरीन रुग्णालयातील दुर्घटनेपूर्वीच विद्युत बिघाडाचा इशारा?

अतिदक्षता विभागाजवळ महिन्यापूर्वी वॉशिंग मशीन जळाल्याची माहिती; प्रकार वरिष्ठांच्या निदर्शनास आणला असता तर तीन बालकांचा जीव वाचला असता का?

अमरावती : अमरावतीच्या जिल्हा स्त्री रुग्णालयातील नवजात शिशु अतिदक्षता विभागात व्हेंटिलेटरचा स्फोट होऊन तीन नवजात बालकांचा मृत्यू झाल्याच्या दुर्घटनेनंतर आता रुग्णालयातील विद्युत यंत्रणेच्या सुरक्षिततेवर गंभीर प्रश्न उपस्थित झाले आहेत. या दुर्घटनेच्या पार्श्वभूमीवर एक धक्कादायक माहिती समोर आली आहे.

ज्या अतिदक्षता विभागात भीषण आगीची घटना घडली, त्याच्या जवळच्या दुसऱ्या युनिटमध्ये सुमारे महिनाभरापूर्वी वॉशिंग मशीन जळाल्याची माहिती आता समोर आली आहे. विशेष म्हणजे, हा प्रकार रुग्णालयातील कर्मचाऱ्यांच्या निदर्शनास आला होता; मात्र तो वरिष्ठ अधिकाऱ्यांच्या निदर्शनास आणून देण्यात आला नसल्याचा आरोप केला जात आहे.

विद्युत यंत्रणेतील बिघाडाकडे दुर्लक्ष?

वॉशिंग मशीन जळण्याची घटना त्याच वेळी वरिष्ठ अधिकाऱ्यांना कळवण्यात आली असती, तर संबंधित विद्युत यंत्रणेची तपासणी झाली असती. विद्युत वायरिंग, उपकरणे किंवा अन्य तांत्रिक बाबींमध्ये काही बिघाड असल्यास तो त्याच वेळी समोर आला असता आणि आवश्यक दुरुस्ती करता आली असती, असा सवाल आता उपस्थित होत आहे.

त्यामुळे महिनाभरापूर्वी झालेल्या या घटनेकडे दुर्लक्ष करण्यात आले का? संबंधित कर्मचाऱ्यांनी हा प्रकार वरिष्ठांपासून का लपवला? वॉशिंग मशीन जळाल्यानंतर विद्युत यंत्रणेची तांत्रिक तपासणी करण्यात आली होती का? असे अनेक प्रश्न आता निर्माण झाले आहेत.

वेळीच माहिती दिली असती तर दुर्घटना टळली असती का?

व्हेंटिलेटरचा स्फोट होऊन तीन नवजात बालकांचा मृत्यू झाल्याने संपूर्ण अमरावती हादरली आहे. अशा परिस्थितीत महिनाभरापूर्वीच रुग्णालयातील जवळच्या युनिटमध्ये विद्युत उपकरण जळाल्याची घटना घडली होती, ही बाब अत्यंत गंभीर मानली जात आहे.

जर त्या वेळी वरिष्ठ अधिकाऱ्यांना माहिती देऊन संपूर्ण विद्युत यंत्रणेची तपासणी करण्यात आली असती, तर संभाव्य धोका लक्षात आला असता का? विद्युत बिघाड दुरुस्त करता आला असता का? आणि सर्वात महत्त्वाचे म्हणजे, आजची दुर्घटना टाळता आली असती का? हे प्रश्न आता तपासाचा भाग होणे गरजेचे आहे.

कर्मचाऱ्यांची भूमिका तपासण्याची मागणी

या पार्श्वभूमीवर केवळ व्हेंटिलेटरमध्ये झालेल्या तांत्रिक बिघाडाची चौकशी न करता, रुग्णालयातील संपूर्ण विद्युत यंत्रणेची देखभाल, उपकरणांची नियमित तपासणी, पूर्वी घडलेल्या विद्युत बिघाडांची नोंद आणि त्यावर करण्यात आलेली कार्यवाही यांचीही सखोल चौकशी करण्याची गरज आहे.

महिन्याभरापूर्वी वॉशिंग मशीन जळाल्याची घटना नेमकी कधी घडली, त्यावेळी कोणत्या कर्मचाऱ्यांना याची माहिती होती, वरिष्ठांना माहिती देण्यात आली होती का, दुरुस्ती कोणाकडून करण्यात आली आणि त्यानंतर विद्युत सुरक्षेची तपासणी झाली होती का, याची माहिती तपासातून समोर येणे आवश्यक आहे.

तीन नवजात बालकांच्या मृत्यूनंतर आता या कथित पूर्वघटनेकडेही गांभीर्याने पाहण्याची गरज आहे. पूर्वीचा इशारा दुर्लक्षित झाला का आणि त्या दुर्लक्षाचा संबंध पुढील दुर्घटनेशी आहे का, याचा निष्पक्ष तपास झाल्यासच या प्रकरणातील जबाबदारी निश्चित होऊ शकणार आहे.

डफरीन रुग्णालयातील या दुर्घटनेत तीन निष्पाप बालकांचा मृत्यू झाला आहे. त्यामुळे आता प्रत्येक संभाव्य कारणाचा तपास करून, जर कोणाची निष्काळजीपणा किंवा माहिती लपवण्याची भूमिका आढळली, तर संबंधितांवर कठोर कारवाई होणार का, याकडे अमरावतीकरांचे लक्ष लागले आहे.