कारंज्यात भररस्त्यात तरुणावर जीवघेणा हल्ला; CCTV व्हिडिओ व्हायरल
१० ते १५ जणांच्या टोळक्याचा लाठ्या, क्रिकेट बॅटने हल्ला; दुकानात घुसून मारहाण व तोडफोड, दोन जण जखमी
वाशिम | प्रतिनिधी
वाशिम जिल्ह्यातील कारंजा शहरात भरदिवसा घडलेल्या एका धक्कादायक घटनेमुळे कायदा व सुव्यवस्थेचा प्रश्न पुन्हा ऐरणीवर आला आहे. समता नगर परिसरात १० ते १५ जणांच्या टोळक्याने एका तरुणावर लाठ्या, काठ्या, क्रिकेट बॅट आणि इतर वस्तूंनी जीवघेणा हल्ला केल्याची घटना घडली. या हल्ल्याचा सीसीटीव्ही व्हिडिओ सोशल मीडियावर मोठ्या प्रमाणात व्हायरल होत आहे.
प्राथमिक माहितीनुसार, जुन्या आपसी वादातून हा हल्ला करण्यात आला. हल्लेखोरांनी भररस्त्यात संबंधित तरुणाला गाठून बेदम मारहाण केली. जीव वाचवण्यासाठी तो जवळील एका दुकानात पळून गेला. मात्र, हल्लेखोरांनी दुकानातही प्रवेश करून त्याच्यावर पुन्हा हल्ला केला.
या घटनेदरम्यान दुकानातील साहित्याची तोडफोड करण्यात आली. या हल्ल्यात दोन तरुण गंभीर जखमी झाल्याची प्राथमिक माहिती समोर आली आहे.
घटनेचा संपूर्ण प्रकार परिसरातील सीसीटीव्ही कॅमेऱ्यात कैद झाला असून, त्याचा व्हिडिओ सोशल मीडियावर वेगाने प्रसारित होत आहे. मात्र, व्हिडिओतील दावे आणि घटनेमागील कारणांचा तपास पोलीस करत आहेत.
या प्रकरणामागील नेमके कारण अद्याप अधिकृतरीत्या स्पष्ट झालेले नसले तरी जुन्या वादातून हा हल्ला झाल्याची प्राथमिक माहिती समोर येत आहे. पोलिसांनी गुन्हा नोंदवून आरोपींचा शोध सुरू केला असून पुढील तपास सुरू आहे.
या घटनेनंतर कारंजा शहरात नागरिकांमध्ये भीतीचे वातावरण निर्माण झाले असून, वाढत्या गुन्हेगारीवर नियंत्रण आणण्यासाठी पोलिसांनी कठोर आणि प्रभावी कारवाई करावी, अशी मागणी नागरिकांकडून होत आहे.
