पुसद बस स्थानकातील जीर्ण इमारतीत सुरू एनसीएमसी कार्ड प्रक्रिया; प्रवाशांच्या सुरक्षेवर प्रश्नचिन्ह

धोकादायक इमारतीत नागरिकांची गर्दी; कार्ड वितरण केंद्र सुरक्षित ठिकाणी हलविण्याची मागणी

यवतमाळ | प्रतिनिधी

यवतमाळ जिल्ह्यातील पुसद बस स्थानकात राष्ट्रीय समान गतिशीलता कार्ड (एनसीएमसी) वितरणाची प्रक्रिया जीर्ण आणि संभाव्य धोकादायक इमारतीत सुरू असल्याचा आरोप होत आहे. विविध प्रवासी सवलतींचा लाभ घेण्यासाठी दररोज मोठ्या संख्येने नागरिक येथे येत असून, अशा परिस्थितीत प्रवाशांच्या सुरक्षिततेबाबत गंभीर प्रश्न उपस्थित केले जात आहेत.

महाराष्ट्र राज्य मार्ग परिवहन महामंडळामार्फत विविध योजनांचा लाभ मिळविण्यासाठी एनसीएमसी (National Common Mobility Card) काढण्याची प्रक्रिया सुरू आहे. पुसद बस स्थानकातही या कार्डसाठी मोठ्या प्रमाणात नागरिकांची गर्दी होत असून, लाडकी बहीण योजनेतील महिला, ज्येष्ठ नागरिक तसेच ग्रामीण भागातील प्रवासी मोठ्या संख्येने येथे येत आहेत.

मात्र, ज्या इमारतीत कार्ड वितरण केंद्र कार्यरत आहे, त्या इमारतीची अवस्था अत्यंत जीर्ण झाल्याचे दिसून येत आहे. इमारतीच्या कॅन्टिलिव्हरवरील बाह्य भाग (एलिव्हेशन) अनेक ठिकाणी तुटलेले असून काही ठिकाणी काँक्रीटचे तुकडे खाली पडल्याचेही सांगितले जात आहे.

यामुळे धोकादायक इमारतीखालीच नागरिकांना रांगेत उभे राहावे लागत असल्याने त्यांच्या सुरक्षिततेबाबत चिंता व्यक्त केली जात आहे. या संदर्भातील व्हिडिओही समोर आला असून त्यामध्ये इमारतीची जीर्ण अवस्था दिसून येत असल्याचा दावा केला जात आहे.

स्थानिक नागरिक आणि प्रवाशांनी संबंधित प्रशासनाने तातडीने हस्तक्षेप करून एनसीएमसी कार्ड वितरण केंद्र सुरक्षित ठिकाणी स्थलांतरित करावे, तसेच जीर्ण इमारतीची तांत्रिक पाहणी करून आवश्यक ती दुरुस्ती किंवा पाडकाम करावे, अशी मागणी केली आहे.

प्रवाशांच्या मते, एखादी दुर्घटना घडल्यानंतर उपाययोजना करण्यापेक्षा संभाव्य धोका ओळखून वेळेत प्रतिबंधात्मक कारवाई करणे अधिक आवश्यक आहे.

दरम्यान, या प्रकरणाबाबत संबंधित विभागाकडून अधिकृत भूमिका समोर आलेली नसून, प्रवाशांच्या सुरक्षेच्या दृष्टीने प्रशासन कोणती पावले उचलते, याकडे सर्वांचे लक्ष लागले आहे.