नागपुरात ५४ किलो ९९८ ग्रॅम गांजा जप्त; दोघांना अटक

गुन्हे शाखेची शांतीनगर परिसरात धडक कारवाई; १६.५१ लाखांचा मुद्देमाल जप्त

नागपूर | प्रतिनिधी

नागपूर शहरात अमली पदार्थांविरोधात गुन्हे शाखेच्या अमली पदार्थविरोधी पथकाने मोठी कारवाई करत शांतीनगर पोलीस ठाण्याच्या हद्दीतून तब्बल ५४ किलो ९९८ ग्रॅम गांजा जप्त केला आहे. या प्रकरणी दोन आरोपींना अटक करण्यात आली असून, कारवाईदरम्यान १६ लाख ५१ हजार ५२० रुपयांचा मुद्देमाल जप्त करण्यात आला आहे.

पोलिसांनी दिलेल्या माहितीनुसार, गोपनीय माहितीच्या आधारे गुन्हे शाखेच्या पथकाने शांतीनगर परिसरातील दलाल चौक येथील एका टीन शेडवर छापा टाकला. कारवाईदरम्यान शेख जावेद शेख मुन्ना आणि मोहम्मद हारून रशीद पिंजारी या दोघांना ताब्यात घेण्यात आले. दोघेही शांतीनगर परिसरातील रहिवासी असल्याचे पोलिसांनी सांगितले.

पंचांसमक्ष करण्यात आलेल्या झडतीमध्ये आरोपींकडून ५४ किलो ९९८ ग्रॅम गांजा जप्त करण्यात आला. जप्त केलेल्या गांज्याची अंदाजे किंमत १३ लाख ७४ हजार ९५० रुपये असल्याचे पोलिसांनी सांगितले.

याशिवाय कारवाईदरम्यान तीन मोबाईल फोन, एक सुझुकी बर्गमन दुचाकी, १ लाख ३५ हजार ५७० रुपये रोख रक्कम तसेच दोन इलेक्ट्रॉनिक वजनकाटे जप्त करण्यात आले. या सर्व मिळून जप्त करण्यात आलेल्या मुद्देमालाची एकूण किंमत १६ लाख ५१ हजार ५२० रुपये इतकी आहे.

या प्रकरणी आरोपींविरुद्ध अंमली पदार्थ व मनःप्रभावी पदार्थ अधिनियम (NDPS Act) अंतर्गत गुन्हा दाखल करण्याची प्रक्रिया सुरू असून, जप्त करण्यात आलेला गांजा कुठून आणण्यात आला, त्याचा पुरवठा कोणाला केला जाणार होता आणि या रॅकेटमध्ये आणखी कोणाचा सहभाग आहे का, याचा सखोल तपास पोलीस करीत आहेत.

नागपूर पोलिसांच्या या कारवाईमुळे शहरातील अमली पदार्थांच्या अवैध व्यापाराला मोठा धक्का बसल्याचे मानले जात असून, पुढील तपासातून आणखी महत्त्वाची माहिती समोर येण्याची शक्यता व्यक्त केली जात आहे.