बोरखेडी जिल्हा परिषद शाळेचा अनोखा प्रवेशोत्सव; विद्यार्थ्यांसोबत जिल्हाधिकाऱ्यांनी धरला ठेका

‘माझी शाळा लय भारी’च्या तालावर रंगला उत्सव; शिक्षण, संस्कार आणि आनंदाचा अनोखा संगम

बुलढाणा | प्रतिनिधी

सरकारी शाळांविषयीची पारंपरिक प्रतिमा बदलत बुलढाणा जिल्ह्यातील बोरखेडी आदर्श जिल्हा परिषद शाळेने यंदाचा प्रवेशोत्सव आगळ्यावेगळ्या पद्धतीने साजरा केला. विद्यार्थ्यांचे उत्साहात स्वागत, सांस्कृतिक कार्यक्रम आणि मान्यवरांचा सहभाग यामुळे हा प्रवेशोत्सव केवळ औपचारिक कार्यक्रम न ठरता आनंद, प्रेरणा आणि संस्कारांचा उत्सव ठरला.

नवीन शैक्षणिक वर्षाच्या प्रारंभी शाळेत दाखल होणाऱ्या विद्यार्थ्यांचे फुलांचा वर्षाव, टाळ्यांचा कडकडाट, ढोल-ताशांचा गजर आणि विविध सांस्कृतिक कार्यक्रमांच्या माध्यमातून उत्स्फूर्त स्वागत करण्यात आले. संपूर्ण शाळा परिसरात आनंदाचे आणि उत्साहाचे वातावरण निर्माण झाले होते.

कार्यक्रमाचे प्रमुख आकर्षण म्हणजे जिल्हाधिकारी प्रविणकुमार देवरे आणि जिल्हा शिक्षणाधिकारी विकास पाटील यांनी विद्यार्थ्यांसोबत “माझी शाळा लय भारी” या लोकप्रिय गीतावर ठेका धरत कार्यक्रमात सहभाग घेतला. मान्यवरांचा हा उत्स्फूर्त सहभाग विद्यार्थ्यांसाठी संस्मरणीय ठरला.

यावेळी जिल्हाधिकारी प्रविणकुमार देवरे यांनी विद्यार्थ्यांशी संवाद साधत शिक्षणासोबत चांगले संस्कार, नियमित वाचन, शिस्त आणि सर्वांगीण विकासाचे महत्त्व अधोरेखित केले. शाळेत राबविण्यात येणाऱ्या विविध नाविन्यपूर्ण शैक्षणिक उपक्रमांचे त्यांनी कौतुक केले.

जिल्हा शिक्षणाधिकारी विकास पाटील यांनीही बोरखेडी जिल्हा परिषद शाळेच्या कार्याचे कौतुक करत ग्रामीण भागातील शासकीय शाळा आधुनिक शिक्षण, तंत्रज्ञानाचा वापर आणि गुणवत्तापूर्ण उपक्रमांच्या बळावर खासगी शाळांनाही सक्षमपणे स्पर्धा देत असल्याचे नमूद केले.

महाराष्ट्रभर आदर्श शाळा म्हणून ओळख निर्माण केलेल्या या शाळेने प्रवेशोत्सवाला केवळ स्वागत समारंभ न ठेवता विद्यार्थ्यांसाठी प्रेरणादायी आणि आनंददायी अनुभवात रूपांतरित केले. या उपक्रमामुळे पालक, विद्यार्थी आणि ग्रामस्थांमध्ये जिल्हा परिषद शाळांविषयी सकारात्मक विश्वास आणि आकर्षण निर्माण होत असल्याचे दिसून आले.

“शाळा म्हणजे केवळ शिक्षणाचे केंद्र नसून संस्कार, आनंद आणि स्वप्नांना दिशा देणारे घर आहे,” हा संदेश या आगळ्यावेगळ्या प्रवेशोत्सवातून प्रभावीपणे देण्यात आला.

बोरखेडी आदर्श जिल्हा परिषद शाळेचा हा उपक्रम शिक्षण क्षेत्रासाठी प्रेरणादायी ठरत असून, विद्यार्थ्यांना आनंदी वातावरणात शिक्षणाची गोडी लावण्याचा हा प्रयत्न इतर शाळांसाठीही आदर्श मानला जात आहे.