नागपुरात खळबळ! बेपत्ता राहुल साहू यांचा मृतदेह बोऱ्यात, नारा घाटातील नाल्यात आढळला; हत्येचा संशय
नागपूर शहरातून एक धक्कादायक आणि सनसनाटी घटना समोर आली आहे. सदर परिसरातून बेपत्ता झालेल्या ३८ वर्षीय राहुल सुनील साहू यांचा मृतदेह नारा घाट परिसरात बोऱ्यात बांधलेल्या अवस्थेत नाल्यात आढळून आला आहे. या घटनेमुळे संपूर्ण परिसरात खळबळ उडाली असून, हा प्रकार हत्या असल्याचा संशय व्यक्त केला जात आहे.
नागपूरमधील जरिपटका पोलीस ठाण्याच्या हद्दीत येणाऱ्या नारा घाट परिसरात आज सकाळी हा भीषण प्रकार उघडकीस आला. स्थानिकांना नाल्यात एक संशयास्पद बोरा दिसल्याने त्यांनी तात्काळ पोलिसांना माहिती दिली. पोलिसांनी घटनास्थळी धाव घेत बोरा उघडून पाहिला असता त्यामध्ये एका व्यक्तीचा मृतदेह आढळून आला.
तपासादरम्यान मृत व्यक्तीची ओळख राहुल सुनील साहू (वय ३८) अशी पटली. साहू हे जिंगाबाई टाकळी परिसरातील रहिवासी असून, ते काही दिवसांपासून बेपत्ता होते. प्राथमिक माहितीनुसार, ते ओयो हॉटेलशी संबंधित व्यवसाय करत असल्याचे समोर आले आहे.
मृतदेह बोऱ्यात बांधून नाल्यात टाकण्यात आल्याने हा प्रकार पूर्वनियोजित हत्येचा असल्याचा संशय अधिक बळावला आहे. मृतक विवाहित असून त्यांच्या पश्चात पत्नी आणि दोन लहान मुले आहेत.
पोलिसांनी घटनास्थळी पंचनामा करून मृतदेह शवविच्छेदनासाठी पाठवला असून, जरिपटका पोलीस या प्रकरणाचा सखोल तपास करत आहेत. हत्येमागील नेमके कारण काय, याचा शोध घेण्यासाठी पोलिसांकडून विविध कोनातून तपास सुरू आहे.
दरम्यान, या घटनेमुळे नागपूर शहरात भीतीचे वातावरण निर्माण झाले आहे. हा प्रकार हत्या आहे की इतर काही कारण, हे तपासानंतर स्पष्ट होणार असून, आरोपींचा शोध सुरू आहे. लवकरच या प्रकरणात मोठा खुलासा होण्याची शक्यता वर्तवली जात आहे.
