पंजाबमध्ये 144 वाहन खरेदीत घोटाळ्याचे आरोप; ईडीच्या विशेष न्यायालयात याचिका
चंदीगड, प्रतिनिधी :
पंजाब सरकारकडून 2023 मध्ये पोलिसांसाठी खरेदी करण्यात आलेल्या 144 वाहनांच्या खरेदी प्रक्रियेत गंभीर गैरव्यवहार झाल्याचे आरोप समोर आले आहेत. या प्रकरणी अंमलबजावणी संचालनालयाच्या (ईडी) विशेष पीएमएलए न्यायालयात याचिका दाखल करण्यात आली आहे.
मिळालेल्या माहितीनुसार, हा संपूर्ण मामला 144 टोयोटा हिलक्स (मॅन्युअल ट्रान्समिशन) वाहनांच्या खरेदीशी संबंधित आहे. या वाहनांची खरेदी बाजारभावापेक्षा सुमारे 10.72 लाख रुपये प्रति वाहन जास्त दराने केल्याचा आरोप याचिकेत करण्यात आला आहे.
ही याचिका सर्वोच्च न्यायालयातील वकील निखिल सराफ यांनी दाखल केली असून, यात पंजाबचे कार्यकारी डीजीपी गौरव यादव, टोयोटा किर्लोस्कर मोटर्सचे एमडी मसाकाजु योहिमुरा आणि पंजाब विजिलन्स ब्युरोचे प्रमुख प्रवीण सिन्हा यांच्यावर भ्रष्टाचार, मनी लॉन्ड्रिंग आणि सरकारी निधीचा गैरवापर केल्याचे आरोप करण्यात आले आहेत.
याचिकेत असेही नमूद करण्यात आले आहे की, मोठ्या प्रमाणावर सरकारी वाहनांची खरेदी करताना सामान्यतः सवलत मिळते. मात्र या प्रकरणात उलट जास्त दराने खरेदी करण्यात आल्याने संशय अधिक गडद झाला आहे.
या प्रकरणाची गंभीरता लक्षात घेऊन न्यायालयाने याचिकाकर्त्याला प्राथमिक पुरावे सादर करण्याचे निर्देश दिले आहेत.
या प्रकरणामुळे पंजाबमधील प्रशासकीय व्यवस्थेवर प्रश्नचिन्ह निर्माण झाले असून, पुढील सुनावणीत काय निष्पन्न होते याकडे सर्वांचे लक्ष लागले आहे.
