विझोरा परिसरात अज्ञात वाहनाच्या धडकेत नीलगाय जखमी; वन विभाग आणि समाजसेवकांच्या सतर्कतेमुळे वाचले प्राण

भोकरदन: तालुक्यातील विझोरा परिसरात अज्ञात वाहनाच्या धडकेत एक नीलगाय गंभीर जखमी झाल्याची घटना १७ जानेवारी २०२६ रोजी घडली. मात्र, स्थानिक समाजसेवकांची सतर्कता आणि वन विभागाच्या तत्परतेमुळे या मुक्या प्राण्याला जीवदान मिळाले असून, सध्या तिच्यावर जालना येथे उपचार सुरू आहेत.

नेमकी घटना काय?

विझोरा परिसरातील रस्त्यालगत असलेल्या शेतात एक नीलगाय जखमी अवस्थेत पडून असल्याचे समाजसेवक मुस्तफा पठाण व राजू शहा यांच्या निदर्शनास आले. त्यांनी परिस्थितीचे गांभीर्य ओळखून वेळ न घालवता तात्काळ वन विभागाला या घटनेची माहिती दिली.

रेस्क्यू ऑपरेशनचा थरार

माहिती मिळताच वन परिमंडळ अधिकारी योगेश डोमळे यांच्या मार्गदर्शनाखाली वनरक्षक आनंद वरशील, वनसेवक जयाजी सीनगारे, शाम गव्हाणे व मोमीन तडवी यांचे पथक तातडीने घटनास्थळी दाखल झाले. तपासणीत नीलगायचा एक पाय गंभीर जखमी असल्याचे दिसले. जखमी अवस्थेत नीलगाय सैरावैरा पळत असल्याने तिला पकडण्यात अडचणी येत होत्या.

अखेर, संभाजीनगर येथील वन्यजीव रक्षक आशिष जोशी व त्यांच्या पथकाला पाचारण करण्यात आले. संयुक्त प्रयत्नांनंतर नीलगायचे यशस्वी रेस्क्यू करण्यात आले.

पुढील उपचारासाठी जालन्याला रवाना

पशुवैद्यकीय अधिकारी श्री. बोरडे यांनी घटनास्थळी नीलगायवर प्राथमिक उपचार केले. मात्र, जखम खोल असल्याने वरिष्ठ अधिकाऱ्यांच्या सूचनेनुसार तिला पुढील उपचारासाठी जालना येथे हलवण्यात आले आहे. ही सर्व कार्यवाही सहाय्यक वनसंरक्षक (जालना) सुदाम मुंढे व वन परिक्षेत्र अधिकारी श्रीमती नीता फुले यांच्या मार्गदर्शनाखाली पार पडली.

प्रशासनाकडून समाजसेवकांचे कौतुक

वन्यजीवाचा जीव वाचवण्यासाठी वेळेत माहिती दिल्याबद्दल वन विभागातर्फे मुस्तफा पठाण आणि राजू शहा यांचे विशेष आभार मानण्यात आले. “नागरिकांनी अशाच प्रकारे वन्यजीवांच्या बाबतीत सतर्कता दाखवल्यास अनेक मुक्या प्राण्यांचे प्राण वाचवता येतील,” अशी भावना वन विभागाने व्यक्त केली आहे.