पुणे महापालिका निवडणुकीच्या तोंडावर महाविकास आघाडीमध्ये मोठी अस्वस्थता निर्माण झाली असून, शरद पवार यांच्या राष्ट्रवादी काँग्रेस पक्षाने (NCP – शरद पवार गट) काँग्रेसवर उघड नाराजी व्यक्त केल्याची माहिती समोर येत आहे. उमेदवारी अर्ज दाखल करण्यासाठी अवघे 48 तास उरले असतानाही जागावाटपाचा तिढा कायम असून, यामुळे पुण्यातील राजकारणात मोठी उलथापालथ होण्याची शक्यता निर्माण झाली आहे.
काँग्रेसच्या ‘या’ निर्णयामुळे राष्ट्रवादी नाराज
सूत्रांच्या माहितीनुसार, काँग्रेस पक्षाने प्रशांत जगताप यांना पक्षात प्रवेश दिल्याने शरद पवार गट अस्वस्थ झाला आहे. प्रशांत जगताप हे यापूर्वी राष्ट्रवादीशी संबंधित होते. काँग्रेसने अचानक त्यांचे स्वागत केल्याने “आम्हाला डिवचण्याचा हा प्रकार आहे,” असा आरोप राष्ट्रवादीकडून करण्यात येत आहे.
याच कारणामुळे काल दुपारपासून शरद पवारांची राष्ट्रवादी काँग्रेस महाविकास आघाडीच्या संपर्कात नसल्याचे समोर आले आहे. काल संध्याकाळी पार पडलेल्या महत्त्वाच्या बैठकीलाही राष्ट्रवादीचे प्रतिनिधी अनुपस्थित राहिले.
आज दुपारपर्यंत प्रतीक्षा; अन्यथा दोन पक्षांची आघाडी
काँग्रेसकडून आज दुपारपर्यंत राष्ट्रवादीकडून प्रतिसादाची वाट पाहिली जाणार आहे. मात्र, जर राष्ट्रवादीने स्पष्ट भूमिका घेतली नाही, तर काँग्रेस आणि उद्धव ठाकरे गटाची शिवसेना (उबाठा) एकत्रितपणे निवडणूक लढवण्याचा निर्णय घेण्याची शक्यता आहे.
संभाव्य जागावाटप (राष्ट्रवादी बाहेर राहिल्यास):
- काँग्रेस – 100 जागा
- शिवसेना (उबाठा) – 65 जागा
दोन्ही राष्ट्रवादी पुन्हा एकत्र येणार? दबक्या आवाजात चर्चा
या साऱ्या घडामोडींमुळे पुण्यात शरद पवार गट आणि अजित पवार गट पुन्हा जवळ येण्याची शक्यता असल्याची चर्चा राजकीय वर्तुळात सुरु झाली आहे. महाविकास आघाडीतील नाराजीचा फायदा घेत दोन्ही राष्ट्रवादी पुन्हा एकत्र येणार का, याकडे सर्वांचे लक्ष लागले आहे.
मनसे आणि वंचितही आघाडीत?
दरम्यान, शुक्रवारी आणि शनिवारी मध्यरात्री झालेली महाविकास आघाडीची बैठक पहाटे अडीच वाजेपर्यंत चालली. या बैठकीनंतर स्थानिक मनसे पदाधिकारीही चर्चेत सहभागी झाले, अशी माहिती सूत्रांनी दिली.
मनसे पुण्यात उद्धव ठाकरे गटाच्या शिवसेनेसह जाण्यास तयार असल्याचे संकेत आहेत. जर महाविकास आघाडीचे जागावाटप अंतिम झाले, तर शिवसेनेच्या कोट्यातील काही जागा मनसेला दिल्या जाऊ शकतात.
याशिवाय, आंबेडकर यांची वंचित बहुजन आघाडीही मविआत सहभागी होण्याची शक्यता असून, वंचितने 40 जागांची मागणी केल्याची माहिती राष्ट्रवादीचे प्रवक्ते काकडे यांनी दिली आहे.
पुण्याच्या राजकारणात मोठा ट्विस्ट अटळ?
एकीकडे शरद पवारांची राष्ट्रवादी नाराज, दुसरीकडे काँग्रेस-शिवसेनेची तयारी, मनसे-वंचितच्या एन्ट्रीमुळे पुण्यातील राजकारणात मोठा ट्विस्ट अटळ मानला जात आहे. येत्या काही तासांत होणारे निर्णय पुणे महापालिकेच्या निवडणुकीचे राजकीय गणित पूर्णपणे बदलू शकतात.
