डॉक्टरकडून रुग्णाला बेदम मारहाण; आयजीएमसी हॉस्पिटलमधील व्हिडीओने खळबळ

डॉक्टर म्हणजे रुग्णांसाठी देवदूत मानले जातात. रुग्ण पूर्णपणे बरा व्हावा यासाठी ते अहोरात्र मेहनत घेतात. मात्र, हिमाचल प्रदेशातील शिमला येथील आयजीएमसी (IGMC) हॉस्पिटलमधून डॉक्टरांच्या प्रतिमेला काळिमा फासणारी धक्कादायक घटना समोर आली आहे. उपचारासाठी आलेल्या एका रुग्णाला डॉक्टरने बेदम मारहाण केल्याचा व्हिडीओ सोशल मीडियावर व्हायरल झाल्यानं एकच खळबळ उडाली आहे.

रुग्णावर कोणते उपचार सुरू होते?

कुपवी येथील रहिवासी अर्जुन पनवार हा रुग्ण शिमला येथील एका संस्थेत शिक्षक म्हणून कार्यरत आहे. तो एंडोस्कोपी तपासणीसाठी आयजीएमसी हॉस्पिटलमध्ये दाखल झाला होता. तपासणीनंतर डॉक्टरांनी त्याला दोन तास विश्रांती घेण्याचा सल्ला दिला होता. त्याचा एक्स-रे काढल्यानंतर त्याला एका रिकाम्या वॉर्डमध्ये झोपण्यास सांगण्यात आले.

रुग्ण आराम करत असतानाच डॉ. राघव निरुला तेथे आले आणि रुग्णाला झोपण्यास मनाई करू लागले. यावरून दोघांमध्ये वाद झाला आणि काही मिनिटांतच हा वाद थेट हाणामारीत बदलला. आरोपी डॉक्टरने रुग्णावर मारहाण केल्याचा आरोप आहे.

व्हिडीओतील दुसरा डॉक्टर कोण?

व्हायरल व्हिडीओमध्ये दिसणारा दुसरा डॉक्टर निखिल असून, तो रुग्णाचा पाय धरून ठेवताना दिसतो. याबाबत स्पष्टीकरण देताना निखिलने सांगितले की,

“मी रुग्णाला वाचवण्यासाठी मध्ये पडलो होतो, मात्र मी व्हिडीओमध्ये गैरसमजाने कैद झालो.”

दरम्यान, रुग्णाच्या कुटुंबीयांनी गंभीर आरोप करत सांगितले की, आरोपी डॉक्टरविरुद्ध यापूर्वीही दोन ते तीन तक्रारी दाखल झाल्या असून, तो रुग्णांशी अयोग्य वर्तन करतो.

प्रकरण आरोग्यमंत्र्यांपर्यंत पोहोचले

ही घटना समोर येताच प्रकरण थेट हिमाचल प्रदेशचे आरोग्यमंत्री धनी राम शांडिल यांच्यापर्यंत पोहोचले आहे. त्यांनी यावर तीव्र नाराजी व्यक्त करत,

“असे वर्तन कोणत्याही परिस्थितीत खपवून घेतले जाणार नाही. हे डॉक्टरांच्या पेशाला शोभणारे नाही,”
असे स्पष्ट शब्दांत सांगितले.

डॉ. राघव निरुला हे पल्मोनरी मेडिसिन विभागातील एसएआर (Senior Resident) असून, या प्रकरणात कठोर कारवाई केली जाईल, असेही आरोग्यमंत्र्यांनी स्पष्ट केले आहे.

तातडीची बैठक, डॉक्टर निलंबित

या घटनेनंतर आरोग्य सचिव एम. सुधा, आयजीएमसीचे एमएस डॉ. राहुल राव आणि कार्यवाहक प्राचार्य डॉ. अनुपमा जोगता यांच्यासह उच्चस्तरीय बैठक घेण्यात आली. चौकशी पूर्ण होईपर्यंत हल्ला करणाऱ्या कंत्राटी डॉक्टराला निलंबित करण्यात आले आहे.

आरोग्य विभागातील वरिष्ठ अधिकारी आणि आरोग्यमंत्र्यांनी या प्रकरणाची तातडीने दखल घेत कारवाई केल्यामुळे पुढील चौकशीकडे सर्वांचे लक्ष लागले आहे.

आयजीएमसी हॉस्पिटल कुठे आहे?

आयजीएमसी (इंदिरा गांधी मेडिकल कॉलेज) हॉस्पिटल हे हिमाचल प्रदेशातील शिमला येथे स्थित आहे. हे राज्यातील सर्वात मोठ्या आणि महत्त्वाच्या मल्टीस्पेशालिटी रुग्णालयांपैकी एक मानले जाते.