वाशिम जिल्ह्यात बनावट लग्न, दरोडा आणि अपहरणाची गुन्हेगारी साखळी उघड

रिसोड परिसरात दोन मोठे गुन्हे; पोलिसांची धडक कारवाई

वाशिम, दि. : वाशिम जिल्ह्यातील रिसोड परिसरात बनावट लग्न, जबरी दरोडा आणि अपहरण अशा तीन गंभीर गुन्ह्यांची गुंतागुंतीची साखळी पोलिसांनी उघडकीस आणली आहे. वेगवेगळ्या घटनांप्रमाणे दिसणाऱ्या या गुन्ह्यांचा परस्पर संबंध असल्याचे तपासात स्पष्ट झाले असून, या प्रकरणामुळे संपूर्ण परिसरात खळबळ उडाली आहे.

रुग्ण घेऊन जाणाऱ्या वाहनावर दरोडा

रिसोड पोलीस स्टेशन हद्दीतील मोप गावाजवळ दवाखान्यात रुग्ण घेऊन जाणाऱ्या स्विफ्ट डिझायर कारला १० ते १२ आरोपींनी अडवले. कारमधील नागरिकांना बेदम मारहाण करत २२ हजार रुपयांची जबरी लूट करण्यात आली. या घटनेचा तपास सुरू असतानाच पोलिसांना दुसऱ्या एका गंभीर गुन्ह्याचा धागा मिळाला.

बनावट लग्नातून अपहरणाचा कट

दिनांक १० डिसेंबर रोजी आसेगावपेन येथील दीपक खानझोडे यांचा विवाह एजंटमार्फत राधा तुपे हिच्याशी लावून देण्यात आला होता. या लग्नासाठी कुटुंबाकडून दोन लाख रुपये देण्यात आले. मात्र, अवघ्या तीन दिवसांतच नवरी घरातून पळून जाण्याच्या तयारीत असताना दुसऱ्या टोळीने गावात गोंधळ घातला.

नवरी न मिळाल्याने आरोपींनी थेट नवऱ्याचे वडील सिताराम खानझोडे यांचे अपहरण केले. अपहृत व्यक्तीच्या मुलाला “मुलगी आणून द्या, नाहीतर जिवे मारू” अशी धमकी देण्यात आली.

तीन पथकांची कारवाई; अपहृताची सुखरूप सुटका

गुन्ह्याचे गांभीर्य लक्षात घेऊन वाशिम पोलिसांनी तातडीने तीन स्वतंत्र पथके तयार करून अहिल्यानगर, संभाजीनगर आणि जालना येथे रवाना केली. अथक तपासानंतर पोलिसांनी अहिल्यानगर येथून सिताराम खानझोडे यांची सुखरूप सुटका केली.

या कारवाईत राहुल म्हस्के आणि सतीश जाधव यांना अटक करण्यात आली असून, आकाश गायकवाड, नवरी राधा तुपे आणि एजंट शांताराम खराटे यांना ताब्यात घेण्यात आले आहे.

दुहेरी फसवणूक उघड

बनावट लग्न लावून पैसे उकळणे, नंतर नवरी पळवून नेणे आणि अपहरण करून खंडणी मागणे, असे दुहेरी गुन्हेगारी जाळे या टोळीने उभे केल्याचे तपासात समोर आले आहे.

ही संपूर्ण कारवाई पोलीस अधीक्षक अनुज तारे यांच्या मार्गदर्शनाखाली करण्यात आली असून, उर्वरित आरोपींचा शोध सुरू असल्याचे पोलिसांनी सांगितले आहे.